Сурхондарё вилояти аҳолисига кўрсатилаётган урология хизматини янада такомиллаштириш мақсадида ташкил этилган Республика ихтисослаштирилган урология маркази Термиз филиалининг тантанали очилиш маросимида вилоят ҳокимлиги, Республика ихтисослаштирилган урология маркази, соғлиқни сақлаш бошқармаси раҳбар-ходимлари, кенг жамоатчилик вакиллари иштирок этди. Бу ҳақда вилоят ҳокимлиги «Дарё»га хабар берди.
Статистик маълумотларга кўра, Сурхондарё вилоятидаги иқлим шароити ва экологик ҳолат урологик хасталикларнинг кенг тарқалишига сабаб бўлади. Шу боис, аҳоли ўртасида буйрак-тош касалликлари билан оғриган беморлар сони анчагинани ташкил этади. Вилоят кўп тармоқли тиббиёт марказининг урология ва туман тиббиёт бирлашмаларидаги хирургия бўлимларида бундай беморларнинг камгина қисмига хизмат кўрсатиб келинган бўлса, кўпчилиги узоқ йўл босиб пойтахт клиникаларига боришга мажбур бўлишаётган эди. Энди бу муаммоларга барҳам бериладиган бўлди.
Замонавий даволаш-диагностика асбоб-ускуналари билан жиҳозланган 40 ўринли урология ва 10 та «Сунъий буйрак» аппарати мавжуд бўлган гемодиализ бўлимига эга ушбу филиалда юқори малакали маҳаллий кадрлар мактаби яратилиши ҳисобига урологик касалликларни эрта босқичда аниқлаш ва сифатли даволаш, асоратланган урологик касалликлар туфайли юзага келадиганган буйрак етишмовчилигининг олдини олиш, гемодиализ ёрдами самарадорлигини ошириш имконини беради.
Изоҳ (0)