Ўзбекистонда сўнгги йилларда тадбиркорликни янада ривожлантириш учун қулай шарт-шароитлар яратиш бўйича аниқ мақсадга йўналтирилган кенг чора-тадбирлар амалга оширилмоқда, деб хабар қилади Хоразм вилояти туризмни ривожлантириш департаменти матбуот хизмати.
Шундай имкониятлардан бири сифатида Ўзбекистон Республикаси Президентининг 2018 йил 11 апрелдаги «Тадбиркорлик фаолияти соҳасидаги лицензиялаш ва рухсат бериш тартиб-таомилларини янада қисқартириш ва соддалаштириш, шунингдек, бизнес юритиш шарт-шароитларини яхшилаш чора-тадбирлари тўғрисидаги» ПФ-5409-сонли фармони қабул қилинди. Ушбу Фармонга мувофиқ, 2018 йил 1 июнь кунидан бошлаб лицензия ва рухсат бериш хусусиятига эга ҳужжатларни бериш функцияси республика давлат бошқарув органларидан уларнинг ҳудудий бошқармаларига ҳамда маҳаллий давлат ҳокимияти органларига, шунингдек, Қорақалпоғистон Республикаси Вазирлар кенгаши, вилоятлар ва Тошкент шаҳар ҳокимликларидан туман (шаҳар) ҳокимликларига ўтказиш ҳуқуқи берилди.
Шу муносабат билан Хоразм вилояти туризмни ривожлантириш департаментининг туризм фаолиятини лицензиялаш бўлимига туризм фаолияти лицензиясини олиш бўйича Top Management МЧЖ раҳбари Т.Жуманиёзов ҳам ариза билан мурожаат қилди. Вилоят туризмни ривожлантириш департаментининг маъсул ходимлари ёрдами билан қисқа муддат ичида тадбиркорга туризм фаолияти лицензияси берилди ва 14 август санасида вилоят туризмни ривожлантириш департаменти директори томонидан тантанали равишда топширилди.
Изоҳ (0)