Қашқадарё вилоятининг Ғузор тумани, Совлиғор қишлоғида яшовчи Баҳром Қурбонов туман электр таъминоти корхонаси масъул ходимлари хизматидан норози бўлиб, истеъмолчилар ҳуқуқларини ҳимоя қилиш жамиятига ариза билан мурожаат этди. Бу ҳақда ЎзА хабар бермоқда.
Мазкур мурожаат туман жамияти ходимлари иштирокида ўрганилганда, истеъмолчи электр ҳисоблагич орқали электр энергиясидан қонуний фойдаланиб келганлиги, лекин абонент номида 2018 йилнинг февраль ойи ҳолатида 2 692 186 сўм қарздорлик пайдо бўлгани аниқланди.
Фуқаро ҳисобидаги мавжуд қарздорликнинг келиб чиқиш сабаблари ўрганилганда, 2014 йилнинг 13 январь кунида ТЭT корхонаси ходими М.Юсупов истеъмолчи хонадонига бормасдан далолатнома расмийлаштириб, ушбу далолатнома орқали 1 663 200 сўм қарздорлик ҳисоблаганлиги аниқланди.
Истеъмолчи ушбу тузилган далолатномадан норози бўлиб, бир неча маротаба ТЭT корхонасига ёзма ариза билан мурожаат қилган бўлса-да, корхона томонидан истеъмолчидан далолатнома асосида ҳисобланган қарздорликни тўлаб бериш талаб қилинган.
Ўрганишларда тўловлар қайта ҳисоб-китоб қилинди. Натижада Б.Қурбонов номида (2 692 186 – 1 663 200) = 1 028 986 сўм ҳақиқий тўланмаган қарздорлик мавжудлиги аниқланиб, фуқарога ушбу қарздорликни ТЭT корхонасига қисқа муддат ичида тўлаб бериши тушунтирилиб, фуқаро номига расмийлаштирилган далолатнома юзасидан корхона назоратчисидан тушунтириш хати олинди. Назоратчи ўз тушунтириш хатида истеъмолчи хонадонига бормаганлиги ва унинг номига далолатнома тузиб, фуқаро имзосини бошқа шахс томонидан сохталаштирганлиги ва далолатнома ноқонуний тузилганлигини маълум қилди.
Шу боис, фуқаронинг мурожаатини ўрганиш жараёнида тўпланган далилларга кўра, истеъмолчининг бузилган ҳуқуқларини тиклаш мақсадида Ғузор туман маъмурий судига даъво аризаси киритилди.
Томонлар ўртасида бўлиб ўтган суд мажлисида даъво аризасида келтирилган ҳолатга ҳуқуқий баҳо берилганлиги инобатга олиниб, ТЭT корхонаси томонидан истеъмолчи хонадонига далолатнома асосида ҳисобланган қарздорлик ундириш рўйхатидан чиқарилди ва абонент рақамида ҳеч қандай қарздорлик мавжуд эмаслиги тўғрисида маълумотнома тақдим этилди.
Изоҳ (0)