Матбуот ва ахборот агентлиги томонидан Ички ишлар вазирлиги билан ҳамкорликда «Жиноятчиликнинг олдини олиш ҳамда унга қарши курашишда оммавий ахборот воситаларининг ўрни: талаб ва тавсиялар» мавзусида амалий семинар ўтказилди.
Тадбир Президент Шавкат Мирзиёев раислигида жорий йил 27 июль куни ўтказилган жиноятчиликнинг барвақт олдини олиш борасидаги ишларнинг бугунги ҳолатига бағишланган видеоселектор йиғилишида ОАВ олдига қўйилган қатор муҳим вазифалар ижросини таъминлашга бағишланди.
— Таъкидлаш керакки, жамоат хавфсизлигини таъминлаш фақатгина ИИВ эмас, балки барчанинг кундалик ишига айланиши зарур. Албатта, бу борада оммавий ахборот воситаларининг ўрнини алоҳида таъкидлаб ўтиш зарур. ИИВ матбуот хизмати ОАВ учун барча маълумотларни тақдим этишга тайёр, — дейди ИИВ матбуот хизмати бошлиғи Қутбиддин Бурҳонов. — Шу ўринда ОАВ айнан ушбу соҳани ёритиш бўйича алоҳида журналист ажраца, мақсадга мувофиқ бўларди. Чунки ўрганишлар шуни кўрсатяптики, кўп ҳолларда журналистлар воқеа-ҳодисани тўлиқ ўрганмасдан фикр билдиряпти, ёритяпти. Бу эса омма ўртасида тушунмовчиликларни келтириб чиқармоқда.
Масалан, Олий Мажлиси Қонунчилик палатаси депутати жазони ўташ муассасасидаги ўрганишдан кейин ижтимоий тармоқлар орқали «Жазони ўташ муассасаларидаги ходимларнинг ойлик-маоши бу ердаги маҳбуслар сонига боғлиқ экан» деган фикрни билдирди. Бундай фикр билдириш нотўғри деб ўйлайман.
Ёки Каттақўрғондаги воқеа сабаб бутун тизимни ёмонотлиққа чиқариш ҳам яхши эмас. Чунки тинчлик учун ўз жонини фидо қилаётган ходимлар ҳам борлигини эсдан чиқармаслигимиз керак.
Изоҳ (0)