Matbuot va axborot agentligi tomonidan Ichki ishlar vazirligi bilan hamkorlikda “Jinoyatchilikning oldini olish hamda unga qarshi kurashishda ommaviy axborot vositalarining o‘rni: talab va tavsiyalar” mavzusida amaliy seminar o‘tkazildi.
Tadbir Prezident Shavkat Mirziyoyev raisligida joriy yil 27-iyul kuni o‘tkazilgan jinoyatchilikning barvaqt oldini olish borasidagi ishlarning bugungi holatiga bag‘ishlangan videoselektor yig‘ilishida OAV oldiga qo‘yilgan qator muhim vazifalar ijrosini ta’minlashga bag‘ishlandi.
— Ta’kidlash kerakki, jamoat xavfsizligini ta’minlash faqatgina IIV emas, balki barchaning kundalik ishiga aylanishi zarur. Albatta, bu borada ommaviy axborot vositalarining o‘rnini alohida ta’kidlab o‘tish zarur. IIV matbuot xizmati OAV uchun barcha ma’lumotlarni taqdim etishga tayyor, — deydi IIV matbuot xizmati boshlig‘i Qutbiddin Burhonov. — Shu o‘rinda OAV aynan ushbu sohani yoritish bo‘yicha alohida jurnalist ajratsa, maqsadga muvofiq bo‘lardi. Chunki o‘rganishlar shuni ko‘rsatyaptiki, ko‘p hollarda jurnalistlar voqea-hodisani to‘liq o‘rganmasdan fikr bildiryapti, yorityapti. Bu esa omma o‘rtasida tushunmovchiliklarni keltirib chiqarmoqda.
Masalan, Oliy Majlisi Qonunchilik palatasi deputati jazoni o‘tash muassasasidagi o‘rganishdan keyin ijtimoiy tarmoqlar orqali “Jazoni o‘tash muassasalaridagi xodimlarning oylik-maoshi bu yerdagi mahbuslar soniga bog‘liq ekan” degan fikrni bildirdi. Bunday fikr bildirish noto‘g‘ri deb o‘ylayman.
Yoki Kattaqo‘rg‘ondagi voqea sabab butun tizimni yomonotliqqa chiqarish ham yaxshi emas. Chunki tinchlik uchun o‘z jonini fido qilayotgan xodimlar ham borligini esdan chiqarmasligimiz kerak.
Izoh (0)