Бош вазир ўринбосари Азиз Абдуҳакимов Facebook’даги саҳифасида тест синовларидаги кузатув камералари тааллуқли эътирозларга муносабат билдирди.
«Ижтимоий тармоқларда айрим биноларда абитуриентлар кузатув камераларидан узоқда жойлашган, камерага яқин жойлар бўш турибди, деган хабар тарқалди. Давлат тест маркази ва унинг ҳудудий бўлимлари мутахассислари билан бирга ҳолат ўрганилди ҳамда абитуриентлар кузатув камераларига яқин жойлаштирилди», дейилади хабарда.
Бош вазир ўринбосарининг қайд этишича, 2 август куни бўлиб ўтган тест синовларида 25 та олий таълим муассасасининг 63 та таълим йўналишида 57 минг 849 нафар абитуриент иштирок этди.
Турли сабабларга кўра 1219 нафар абитуриент тест синовларига келмади.
Тест синовлари тартиб-қоидаларини бузганлиги сабабли 486 нафар абитуриент имтиҳонлардан четлаштирилди.
2 август кунги тест натижалари 3 август куннинг иккинчи ярмида Давлат тест маркази сайтида эълон қилинади.
Маълумот учун, жорий йилдан бошлаб ота-оналарга қулайлик яратиш мақсадида илк бор тест синовлари Uzdigital TV ва маҳаллий телеканаллар орқали ҳамда test2018.uz сайтида онлайн кўринишида тўғридан-тўғри ёритиб борилмоқда.
Изоҳ (0)