Журналист Никита Макаренко Олий Мажлис Қонунчилик палатасининг шаҳар ва қишлоқларда дарахтларни муҳофаза қилиш тизимини ислоҳ этиш тўғрисидаги петиция бўйича қароридан қониқиш ҳосил қилмаганини маълум қилди. Бу ҳақда «Газета.uz» хабар бермоқда.
«Шаҳар ва қишлоқ ҳудудларда дарахтларни муҳофаза қилиш тизимини ислоҳ этиш тўғрисида»ги электрон жамоавий мурожаат айнан журналист Никита Макаренко муаллифлигида тайёрланган ва «Менинг фикрим» порталига жойлаштирилган эди. Жамоавий мурожаат 12 мингдан ортиқ овоз олиб, Олий Мажлис Қонунчилик палатаси кўриб чиқиши керак бўлган петициялар қаторидан ўрин олган эди.
«Менинг фикрим» порталида 1 август куни депутатларнинг ушбу жамоавий мурожаат бўйича қарори эълон қилинди. Унда депутатлар дарахтларни кесишга нисбатан мораторий жорий этиш таклифини маъқулламаган, бир гап билан айтганда: «Дарахт кесишни тақиқлашнинг имкони йўқ», деб муносабат билдирган. Бундай муносабат жамоавий мурожаат муаллифини қониқтирмади.
«Мен петиция парламент томонидан кўриб чиқилиб, унга жавоб берилгани ҳолатининг ўзиниёқ кичик бир ўсиш деб ҳисоблайман. Бироқ парламент қарорининг ўзи мени қониқтиргани йўқ», — деди Макаренко.«Қарорда дарахтларни қутқариб, уларни муҳофаза қилишга ёрдам берадиган бирорта қатъий чора йўқ. Жарималарни икки ой ичида ошириш — бу биз кутган нарса эмас. Жамоатчилик кескин бир ислоҳот кутганди, бироқ депутатлар бу ислоҳотни қўллаб-қувватлашни истамади. Ижтимоий тармоқлардаги муносабатлардан келиб чиқсак, одамларнинг ҳафсаласи жуда пир бўлган», — деди журналист.
«Дарахтлар кесилиши масаласи ҳамон очиқ қолмоқда, дарахтлар ҳамон ҳимоясиз. Менинг назаримда, ҳозиргидек кўринишдаги жамоавий мурожаатлар ғояси ўзини обрўсизлантириб бўлди. Бундай механизм муаммоларни ҳал қила олмаслиги очиқ кўриниб қолди», — дея қўшимча қилди Никита Макаренко.
Изоҳ (0)