Самарқанд вилоятининг Пахтачи тумани ҳокимлигида Жамоатчилик назорати гуруҳларининг ўрганишлари натижасига бағишланган йиғилиш бўлиб ўтди. «Zarnews.uz» хабарига кўра, йиғилишда вилоят ҳокими вазифасини бажарувчи Эркинжон Турдимов ҳам қатнашган.
Йиғилишда Турдимов маҳаллий бошқарув идоралари вакилларининг фаолияти суст эканини кескин танқид қиларкан, муаммоларни бартараф этишда мутасаддилар фуқаролардан сохта ташаккурномалар ёздириб олинганини айтган.
Масалан, газ баллонлари етказиш бўйича 370 та, қишлоқ хўжалиги масалалари бўйича тўртта, ишга жойлаштиришда тўққизта, тижорат банклари томонидан бешта ариза ижобий ҳал бўлди, деб ёлғон маълумот берилган. Пахтачи туман ҳокимига келган 1 070 та мурожаатнинг 931 таси эса ечимини топмаган.
Йиғилишда Эркинжон Турдимов нотўғри маълумот берган раҳбарларга маъмурий жазо қўллашни тавсия қилди. «Ўз фаолияти масъулиятини ҳис қилмай иш юритаётган бу каби раҳбарлар туфайли аҳолида ишончсизлик кайфияти ортиб кетган», — деб айтган вилоят раҳбари.
Сўнгги кунларда Жамоатчилик назорати гуруҳларининг ўрганишлари натижасида газ баллони масаласида 1,5 мингга яқин мурожаат тушган. Аниқланишича, баъзи ҳудудларга 4 ойдан бери тўлдирилган газ баллони бормаган. Ишсизлик ва иш хақлари бўйича 1 258 та мурожаат олинган.
Туман ҳокимининг саноат ва қурилиш масалалари бўйича ўринбосарига 3 300 та, ёшлар бўйича ўринбосарига 550 та, инвестиция бўйича ўринбосарига 36 та, туман хотин-кизлар қўмитаси раисига 91 та мурожаат келиб тушган. Вилоят раҳбари ушбу мурожаатларни кўриб чиқиб, ечимини топиш учун мутасаддиларга беш кун муҳлат берган.
Изоҳ (0)