Ўзбекистон бош вазири ўринбосари Азиз Абдуҳакимов Facebook’даги саҳифасида мамлакат олий таълим муассасаларига кириш тест синовларининг биринчи куни — 1 август бўйича баъзи маълумотларни эълон қилди.
Бош вазир ўринбосарининг қайд этишича, тест синовлари шахсни идентификациялаш воситалари, видеофиксация ҳамда доимий видеокузатув қурилмалари билан жиҳозланган 57 та бинода 23 та олий таълим муассасаларининг 154 та таълим йўналиши бўйича ўтказилган.
Тест синовларида 58 985 нафар абитуриент иштирок этган. 1 393 нафар абитуриент тест синовларига келмаган. Тест синовлари тартиб қоидаларини бузганлиги сабабли 255 нафар абитуриент тест синовларидан четлаштирилган. Тест синовларига гуруҳ назоратчилари сифатида 2 434 нафар ўқитувчи жалб этилган.
Азиз Абдуҳакимовнинг маълум қилишича, давлат гранти бўйича энг юқори балл — 223,5, тўлов-контракт бўйича энг юқори ўтиш балли 176,7 бўлган. Шунда, давлат гранти бўйича ўртача балл 142,9 ни, тўлов-контракт бўйича эса 123,7 ни ташкил этган.
«Олий таълим муассасалари бўйича энг юқори балл: давлат гранти — 223,5 балл, Тошкент давлат юридик университетининг «Юриспруденсия» (рус) таълим йўналиши; тўлов-контракт — 176,7 балл, Тошкент давлат юридик университетининг «Юриспруденсия» (ўзбек) таълим йўналиши», — деб ёзади бош вазир ўринбосари.
Азиз Абдуҳакимовнинг алоҳида қайд этишича, 1 августдаги тест синовлари натижалари Давлат тест марказининг http://www.dtm.uz/page/test_result саҳифасида 22:00дан эълон қилиниши кўзда тутилган.
Изоҳ (0)