Bosh vazir o‘rinbosari Aziz Abduhakimov: Abituriyentlar kuzatuv kameralariga yaqin joylashtiriladi

Bosh vazir o‘rinbosari Aziz Abduhakimov Facebook’dagi sahifasida test sinovlaridagi kuzatuv kameralari taalluqli e’tirozlarga munosabat bildirdi.

“Ijtimoiy tarmoqlarda ayrim binolarda abituriyentlar kuzatuv kameralaridan uzoqda joylashgan, kameraga yaqin joylar bo‘sh turibdi, degan xabar tarqaldi. Davlat test markazi va uning hududiy bo‘limlari mutaxassislari bilan birga holat o‘rganildi hamda abituriyentlar kuzatuv kameralariga yaqin joylashtirildi” , deyiladi xabarda.

Bosh vazir o‘rinbosarining qayd etishicha, 2-avgust kuni bo‘lib o‘tgan test sinovlarida 25 ta oliy ta’lim muassasasining 63 ta ta’lim yo‘nalishida 57 ming 849 nafar abituriyent ishtirok etdi.

Turli sabablarga ko‘ra 1219 nafar abituriyent test sinovlariga kelmadi.

Test sinovlari tartib-qoidalarini buzganligi sababli 486 nafar abituriyent imtihonlardan chetlashtirildi.

2-avgust kungi test natijalari 3-avgust kunning ikkinchi yarmida Davlat test markazi saytida e’lon qilinadi.

Ma’lumot uchun, joriy yildan boshlab ota-onalarga qulaylik yaratish maqsadida ilk bor test sinovlari Uzdigital TV va mahalliy telekanallar orqali hamda test2018.uz saytida onlayn ko‘rinishida to‘g‘ridan-to‘g‘ri yoritib borilmoqda.