Ўзбекистон Президентининг «2018—2019 йилларда туризм соҳасини ривожлантириш бўйича биринчи навбатдаги чора-тадбирлар тўғрисида»ги қарорига мувофиқ, Ўзбекистон Туризмни ривожлантириш давлат қўмитаси томонидан Interactive System компанияси билан ҳамкорликда хизмат кўрсатиш сифатини мониторинг қилиш ва бошқариш тизими — Hospitality Contract дастури лойиҳасини ишлаб чиқиш ва жорий қилиш ишлари бошланди. Бу ҳақда қўмита хабарида айтилади.
Дастурни амалга ошириш лойиҳаси 2018 йилнинг 1 августига мўлжалланган бўлиб, кейинчалик доимий асосда амал қилади.
«Kun.uz» маълумотларига кўра, қўмита билан «Меҳмондўстлик шартномаси»ни имзолаган ташкилотлар ўз зиммасига қуйидаги мажбуриятларни олади:
- Ходимлар барча меҳмонларни юзда табассум билан кутиб олишлари керак, яъни келган меҳмон ўзининг кутилган эканини ҳис қилиши керак.
- Ходимларнинг нутқи ривожланган бўлиши керак. Имкон қадар маълумотларни меҳмонларга қулай тилларда (камида ўзбек, рус ва инглиз тилларида) етказиш мақсадга мувофиқдир. Меҳмонлар билан хушмуомала бўлиш зарур. Уларга бу борада мунтазам равишда махсус тренинглар ўтказилади.
- Ходимлар дид билан озода кийинган бўлишлари керак (махсус униформалар).
- Персонал барча қўнғироқларга хушмуомала жавоб қайтариши керак. Телефонда тизимли равишда жавоб бериш талаб этилади. (Мижозлар қўнғироқ қилишганида «Ассалому алайкум. Бу «...» қаҳвахонаси ёки «..»" ресторани. Қандай хизмат кўрсатишимиз мумкин?» қабилидаги стандарт жавоблар берилиши мақсадга мувофиқ).
- Санитария-гигиена тармоқлари замонавий стандартларга жавоб бериши ва соатма-соат тозалаш тизимига риоя қилиниши керак. Ҳожатхона, ваннахоналар доимий равишда тоза бўлиши керак. Совун, ҳожатхона қоғози ва бошқа санитария-гигиена воситалари ўз жойида бўлиши шарт.
- ClickSmile СБ базасида хизмат сифати мониторинги ва бошқаруви тизими йўлга қўйиш керак. Унда хизмат кўрсатиш тизимини баҳоловчи «хурсанд бўлдим» ёки «қаноатланмадим» тугмалари бўлади. У Wi-Fi тизими орқали ягона серверга берилади. Кейин турли рейтинглар ишлаб чиқилади. Қанча мижоз ташриф буюргани ва улардан неча киши хизматлардан норози бўлиб кетгани билинади.
Изоҳ (0)