1 август куни халқ депутатлари Оқдарё туман кенгашининг навбатдан ташқари сессияси бўлиб ўтди. «Дарё» мухбири Фарҳод Норбўтаевнинг маълум қилишича, ташкилий масала кўрилган сессияда Самарқанд вилояти ҳокими вазифасини бажарувчи Эркинжон Турдим ва Президент Давлат маслаҳатчиси У.Исмоилов қатнашган.
2016 йил ноябридан бери Оқдарё туманига раҳбарлик қилиб келган Пирматбой Ўсаров ўз аризасига кўра туман ҳокими лавозимидан озод этилди. Унинг ўрнига шу вақтгача «Ўзагросаноатхолдинг»да ишлаб келган Феруз Абилов Оқдарё тумани ҳокими вазифасини бажарувчи этиб тайинланди.
Феруз Абилов «Ўзагросаноатхолдинг» компаниясида Инвестицияларни жалб қилиш, инвестицион лойиҳаларни амалга ошириш ва ишлаб чиқаришни маҳаллийлаштириш бошқармаси бошлиғи лавозимида ишлаган.
Маълумот учун, 1 август куни Самарқанд вилоятининг Тойлоқ ва Пастдарғом туманларида ҳам ҳокимлар ўзгарди. Пастдарғом туманига Тойлоқ туманининг собиқ раҳбари ҳоким этиб тайинланган бўлса, Тойлоққа «Агробанк»нинг Самарқанд вилоят бошқармаси бошлиғи ҳоким бўлди.
Изоҳ (0)