30 июль куни Халқаро пресс клубнинг «Ўзавтосаноат» АЖ фаолияти, соҳада амалга оширилиш лозим бўлган ишлар ҳамда компаниянинг келгусидаги истиқболли режаларига бағишланган сессияси ўтказилди. Унда «Ўзавтосаноат» АЖ раҳбар ва ходимлари, ўринбосарлари, экспертлар, тизимдаги йирик ишлаб чиқариш корхоналари, дилерлик марказлари раҳбарлари ҳамда журналистлар иштирок этди.
«Дарё» мухбири Севара Нишонованинг хабар беришича, сессияда «Ўзавтосаноат» АЖ бошқарув раиси ўринбосари Азизбек Шукуров нима сабабдан ҳозирги кунда фақат Gentra автомобиллари газ баллони ўрнатилган ҳолда ишлаб чиқарилаётганига изоҳ берди.
«Ҳар битта автомобилимизнинг лицензияси, муаллифлик ҳуқуқи General Motors компаниясига тегишли. Компания Венесуэлада Lacetti ва Gentra автомобилларига газ баллони ўрнатиб ишлаб чиқариб келган. Биз мазкур амалиётни Ўзбекистонда қўллашга тез қарор қабул қилиб, халқимизга олиб келдик.
Кўпчилик харидорлар Nexia ва Cobalt автомобилларини ҳам газ баллони билан бирга ишлаб чиқаришимиз юзасидан бизга мурожаат қилади. Бунда биз комплекс ёндашувни амалга оширишимиз керак. Келажакда биз моделларимизни янгилаш устида ҳам иш олиб боришимиз керак, 2—3—4 йил ичида биз моделларимизни янгилаймиз.
Ҳозирги кунда биз ишлаб чиқариб бўлинган Cobalt ва Nexia автомобилларига газ баллони ўрнатадиган бўлсак, технологик жиҳатдан ва инвестиция нуқтайи назаридан катта иш қилишимиз керак ва бу ўзини оқлайдими йўқми деган савол ҳам мавжуд. Баллон қўйилганида машинанинг массаси, оғирлиги ўзгаради. Ўз навбатида мотор, двигатель ва бошқа қисмларини ўзгартириш керак. Биз бу масалани General Motors билан муҳокама қилганимизда 36 ой муҳлат ва битта моделга 8 миллиондан 10 миллион долларгача инвестиция киритиш керак, деган хулосага келган эдик. Албатта, буни келажакда янги модель ишлаб чиқарганимизда бошидан инобатга оламиз ва уларни газ баллони билан бирга ишлаб чиқарамиз», — дейди «Ўзавтосаноат» АЖ бошқарув раиси ўринбосари Азизбек Шукуров.
Изоҳ (0)