30 июль куни Халқаро пресс клубнинг «Ўзавтосаноат» АЖ фаолияти, соҳада амалга оширилиш лозим бўлган ишлар ҳамда компаниянинг келгусидаги истиқболли режаларига бағишланган сессияси ўтказилди. Унда «Ўзавтосаноат» АЖ раҳбар ва ходимлари, ўринбосарлари, экспертлар, тизимдаги йирик ишлаб чиқариш корхоналари, дилерлик марказлари раҳбарлари ҳамда журналистлар иштирок этди.
«Ўзавтосаноат» АЖ раиси Шавкат Умурзоқовнинг таъкидлашича, йил охирига қадар автомобиль бутловчи қисмларининг нархи 20 фоизга арзонлашади, бу эса автомобиль ишлаб чиқариш нархининг 9 фоизга арзонлашишига олиб келади.
«Автосаноатнинг бугунги ҳолатини гапириб ўтишимиз керак. Асака заводи бизнинг товар айланмамизнинг қарийб 90 фоизини ташкил қилади. Заводимиз йилига 290 мингта машина ишлаб чиқариши мумкин. Мен келганимда бу кўрсаткич 160-170 мингтани ташкил қилган. Ҳаммага маълумки, ўз қувватининг фақат 50 фоизига ишлаган завод ишлаб чиқарган маҳсулотнинг таннархи юқори бўлади. Бу харидорларнинг чўнтагига таъсир кўрсатади ва чет элга маҳсулот экспорт қилиш салоҳиятимизни йўққа чиқаради. Бугунги кунда биз автомобилларимизни чет элга экспорт қилишимиз учун, биз уларнинг таннархини 30 фоизга туширишимиз керак.
Биз биринчи қилган ишимиз, бу GM тарихида бўлмаган, бутловчи қисмлар нархини 20 фоизгача туширишга компаниялар билан келишиб олдик. Буни бирданига қилиб бўлмайди. Ушбу жараён босқичма-босқич амалга оширилади. Сабаби, ҳозир биз уларга бирданига нархни 30 фоизга туширасан, десак, уларни батамом ўлдириб қўйишимиз мумкин. Сабаби, уларнинг барчаси кредитда ўтирган ташкилотлар. Автомобильлар яна танқис бўлиб қолади, буни биз тўғри тушунишимиз керак. Компанияларнинг ҳаммаси кредитда ўтирибди. Буларнинг барчаси бутловчи қисмларга тушади, бутловчи қисмлар заводга боради, шу тарзда заводда нарх кўтарилади. Бу автомобилларнинг қимматлашишининг битта сабаби.
Шу тарзда автомобиль бутловчи қисмларининг нархини йил охирига қадар 20 фоизга арзонлаштиришга эришамиз. Бу эса ўз навбатида, автомобилларнинг ишлаб чиқариш нархи 9 фоизга арзонлашишига олиб келади. Бундан ташқари, автомобиллар ишлаб чиқаришни 220 мингтага яъни ҳозир қўшимча йил охиригача автомобиль ишлаб чиқаришни 140 мингтага кўпайтирамиз», — дейди Шавкат Умурзоқов.
Изоҳ (0)