Ўзбекистонга келган Малайзия ҳуқуқ-тартибот органлари вакилларидан иборат делегация Тошкент шаҳар ИИББда бўлди.
Малайзия криминал полицияси бошлиғи ўринбосари Моҳд Закариё бин Аҳмад бошчилигидаги делегация аъзоларини ИИББ бошлиғи ва бошқа мутасаддилар қарши олиб, меҳмонларга мамлакатда, хусусан, пойтахтда ички ишлар тизимида олиб борилаётган ислоҳотлар ҳақида маълумот берди.
Ўзбекистон ва Малайзия аҳоли сони, ер майдони бўйича бир-бирига ўхшаш мамлакатлар. Бўлиб ўтган мулоқотларда эса ҳар икки юрт ички ишлар тизимида ҳам ўзаро яқинликлар борлиги, тузилиш ва функционал вазифалар катта фарқ қилмаслиги маълум бўлди. Яна бир қизиқ факт, Малайзияда ички ишлар органлари томонидан ҳар йили мамлакат бўйича жиноий ҳолатларни 5 фоизга пасайтириб бориш кўзда тутилган. Бироқ жаноб Моҳд Закариё Бин Аҳмаднинг сўзларига кўра, охирги 10 йилда ушбу кўрсаткич 40 фоизни ташкил этган, холос.
Тошкент шаҳрида эса бу борада анча яхши кўрсаткичларга эришилган. Шу йилнинг ўтган 6 ой ва 20 кунида умумий жиноятлар сони қарийб 54 фоизга пасайган. Делегация раҳбари қўлга киритилаётган ушбу ютуқлар билан ҳамкасбларини қутлагани баробарида, Ўзбекистонга амалга оширилган ташриф самарали бўлгани ва бу ўзаро тажриба алмашиш ва алоқаларни янада мустаҳкамлашга замин яратишини алоҳида эътироф этди.
Учрашув доирасида делегация аъзолари Олмазор туманидаги 2-сонли Ички ишлар бўлимида ҳам бўлиб, бу ерда аҳоли мурожаатлари билан ишлаш, ҳудудни замонавий технологиялар асосида назорат ва муҳофаза қилиш учун яратилган шароитлар билан танишди. Шунингдек, пойтахтнинг диққатга сазовор жойларини зиёрат қилди.
Изоҳ (0)