Самарқанднинг номига муносиб бўлмай қолган Сўлим қишлоғида чиқиндиларни қайта ишловчи полигон қурилади

Самарқанд шаҳридаги Хишрав қўрғонидаги қачонлардир аҳоли ҳордиқ чиқарадиган манзил бўлган Сўлим қишлоғи чиқиндихонага айланиб қолганди. Энди ушбу ҳудудда «Самарқанд шаҳрида қаттиқ маиший чиқиндиларни утилизация қилиш тизимини жорий этиш» лойиҳаси амалга оширилади. Уни «Maроқанд Oбод» ДУК 5 йиллик имтиёзли давр билан 20 йил муддатга фойдаланишга олди, дея хабар беради «Дарё» мухбири Фарҳод Норбўтаев.

— Ушбу қўрғоннни олганимизга бир ой бўлди. Бу ерда Франция давлати ривожлантириш агентлиги Осиё департаменти ва Naldeo компанияси билан ҳамкорликда «Самарқанд шаҳрида тўпланадиган маиший чиқиндиларни утилизация қилиш тизими» қурилиши режалаштирилган, - дейди «Maроқанд Oбод» ДУК директори Шуҳрат Маматов. — Қиймати 37,1 миллион еврони ташкил этадиган ушбу лойиҳани жорий йилнинг сентябрь октябрь ойларидан бошлаб амалга ошириш режалаштирилган.

97 гектар ер майдонига эга бўлган ушбу ҳудуднинг 46 гектар ер майдонига чиқиндини кўмиб утилизация қилиш ва ундан метан газ ишлаб чиқариш учун «Биореактор» полигони қурилади. Чуқурлиги 18 метр, узунлиги 300 метрни ташкил этадиган полигоннинг юқори қисми гидроизоляция қилиниб, 1.22 метр қалинликда ёпилади. Унинг устига экин экиш имконияти яратилади.

— Хишрав қўрғони ҳудудида жойлашган шаҳар марказий чиқиндихонасидан 1970 йилдан буён фойдаланиб келинади. Йиллар давомида бу худуддан 4,1 миллион тоннадан кўпроқ чиқинди йиғилиб, утилизация қилиш ишлари олиб борилган, — дейди «Maроқанд Oбод» ДУК бўлим бошлиғи Шоҳруҳ Содиқов. — Самарқанд шаҳри ҳудудидан кунлик ўртача 320-360 тоннагача чиқиндилар чиқарилади. Ёз ва куз мавсумида бу кўрсатгич янада ортади. Лойиҳани амалга ошириш натижасида шаҳар ҳудудидан кунлик йиғиладиган маиший ва қаттиқ чиқиндиларнинг тўпланиб қолиш ҳолатига барҳам берилади.

Лойиҳага кўра, шаҳар бўйича янгидан қуриладиган ва мавжуд чиқинди йиғиш майдончаларининг махсус контейнерларида чиқиндилар сараланиб (металл, пластик, қоғоз, шиша, озиқ овқат), шундан сўнг шаҳар марказий чиқиндихонасига олиб кетилиб, махсус чиқиндини турларга ажратиш қурилмасидан ўтказилади. Ажратилган металл, қоғоз, пластик, политилен, шиша, чинни ва бошқа саноат чиқиндилари қайта ишловчи корхоналарга етказиб берилади.

Ҳозирги кунда шаҳар бўйича 43 та чиқинди қабул қилувчи шохобчалар мавжуд бўлиб, келгусида қўшимча яна 135 та шохобча қуриш режалаштирилган. Икки йил давомида бундай шохобчалар сонини 207 тага етказиш кўзда тутилган. Самарқанд шаҳридаги чиқинди муаммосини бартараф этишни кўзда тутувчи ушбу лойиҳа босқичма-босқич 2024 йилгача амалга ошириш режалаштирилган.