30 июль куни Халқаро пресс клубнинг «Ўзавтосаноат» АЖ фаолияти, соҳада амалга оширилиш лозим бўлган ишлар ҳамда компаниянинг келгусидаги истиқболли режаларига бағишланган сессияси ўтказилди. Унда «Ўзавтосаноат» АЖ раҳбар ва ходимлари, ўринбосарлари, экспертлар, тизимдаги йирик ишлаб чиқариш корхоналари, дилерлик марказлари раҳбарлари ҳамда журналистлар иштирок этди.
Сессияда автомобиллар нархи ошиши, уларнинг олди-сотди жараёнларида фуқаролар дуч келаётган қийинчиликлар ҳақида сўз юритилди ҳамда кўпчиликка қизиқ бўлган саволларга жавоблар берилди.
Хусусан, сессияда «1 августдан эътиборан GM Uzbekistan автомобиллари нархи 14 фоизга ошиши муносабати билан шу санага қадар автомобиль учун 85 фоиз тўловни амалга оширганлар қўшимча тўловни амалга оширадими?», деган саволга «Ўзавтосаноат» АЖ бошқарув раиси Шавкат Умурзоқов қуйидагича жавоб берди:
«1 август санасига қадар автомобиль сотиб олиш учун 85 фоиз тўловни амалга оширган фуқаролар автомобилларни эски нархда сотиб олади. Уларга янги нарх таъсир ўтказмайди».
Шавкат Умурзоқовнинг қайд этишича, нарх ошгунга қадар тўловни амалга оширган фуқаролар автомобилни шартномада кўрсатилган санада, яъни ўз вақтида олиши мумкин бўлади.
Изоҳ (0)