30 июль куни Халқаро пресс клубнинг «Ўзавтосаноат» АЖ фаолияти, соҳада амалга оширилиш лозим бўлган ишлар ҳамда компаниянинг келгусидаги истиқболли режаларига бағишланган сессияси ўтказилди. Унда «Ўзавтосаноат» АЖ раҳбар ва ходимлари, ўринбосарлари, экспертлар, тизимдаги йирик ишлаб чиқариш корхоналари, дилерлик марказлари раҳбарлари ҳамда журналистлар иштирок этди.
Сессияда спикер сифатида иштирок этган «Ўзавтосаноат» АЖ раиси Шавкат Умурзоқов Ўзбекистонда автомобилсозлик ва авто инжиниринг соҳасидаги мутахассисларни тайёрлаш тизимидан қониқмаслигини маълум қилди.
«Биз автосаноатга қизиқадиган иқтидорли ёшларимизни чет чиқиб кетишининг олдини олиб шу ерда олиб қолишимиз керак.
Мен хорижий мамлакатларнинг автомобилсозлик соҳасида таълим бериш тажрибасини ўргандим. Германия, Япония каби мамлакатларда автомобилсозлик институтларида 70 та махсус фан бор. Бизда Турин университетини ҳамма мақтайди. Шахсан ўзим ушбу ОТМ фаолиятини ўрганганимда таълим сифатидан қониқмадим. Университетда бор-йўғи 10 тагина фан ўқитилади. Уларнинг ҳам ҳаммаси назарий. Асосий фанлар бўйича бизда дарсликлар йўқ. Амалий-тажриба машғулотлар ўтилмайди.
Ушбу таълим даргоҳида ўзгратиришлар қилишни мен режалаштирмоқдаман. Бизда соҳанинг кучли мутахассислари бўлмаса, университетларда талабаларга ким билим беради? Мен кучли мутахассисларни жалб қилиш учун маблағ топаман, бунинг учун биз ишлашимиз керак. Бу харидорларнинг айби эмас, балки бизда тизим йиллар давомида нотоғри ташкил қилингани», — дейди Шавкат Умурзоқов.
Изоҳ (0)