Арманистон махсус тергов хизмати мамлакат собиқ президенти Роберт Кочарян (1998—2008 йилларда мамлакатни бошқарган)ни ҳибсга олишни сўраб судга мурожаат қилди. Бу ҳақда идора сайтида айтилади.
«Собиқ президент Роберт Кочарян 2008 йилги президент сайловларидан кейин бир гуруҳ одамлар билан мамлакатда конституцион тузумни ағдарганликда айбланмоқда», — дейилади хабарда.
Ўша вақтда Кочарян икки муддат давомида президентлик қилган ва мамлакат раҳбарлигига бошқа даъвогарлик қила олмас эди. У сайловда ғолиб чиққан Арманистон бош вазири Серж Саргсян номзодини қўллаб-қувватлаган эди. Мухолифат вакили Левон Тер-Петросян тарафдорлари оммавий норозилик намойишларини ўтказгач, Кочаряннинг буйруғи билан, полиция шафқатсиз равишда акция иштирокчиларини тарқатди, натижада ўн киши ҳалок бўлди, кўпчилик яраланди.
Изоҳ (0)