«Дарё» таҳририятига Тошкент шаҳар Яшнобод тумани Авиасозлар 4-мавзе 33-уйда яшовчи фуқаролар номидан ариза келиб тушди. Фуқаролар аризада ўзлари яшаётган уйда қарийб бир йилдан бери лифт ишламаётгани, шунингдек подезддаги зиналар ҳам таъмирталаб эканлигини билдирган. Қуйида мурожаат ўз ҳолича эътиборингизга ҳавола этилади.
Тошкент шаҳар Яшнобод тумани Авиасозлар 4-мавзе 33-уйда жами 81 та хонадон мавжуд. Уларнинг аксариятида узоқ йиллардан бери лифт ишламайди. Лифтларнинг носоз ҳолга келиб қолганига 20 йилдан ошди. Бу вақт давомида деярли ҳар йили лифтлар таъмирланади ва яна бузилаверади. Бугунги кунга келиб эса ана шу лифт янгиланиши шарт бўлиб қолди.
2017 йил сентябрь ойидан бошлаб то жорий йилнинг бугунги кунига қадар лифт носоз ҳолда, яъни ишламайди. Хонадоннинг ёш-у қариси, зиналардан фойдаланиб келмоқда. Зиналарнинг кўриниши бир аҳволга келиб қолган.
Баъзи бир хонадон эгалари 1 йил давомида кўчага чиқмасдан уй ойналаридан кўча юзини томоша қилиб ўтиради.
Ўтган йилнинг 20 октябрь куни ширкат бошлиғи хонадон эгаларини йиғган ҳолда 2017 йилнинг декабрь ойига лифтни янгилаб бериш тўғрисида гапириб ўтган.
«Лифтларни таъмирлашга озмунча пул ажратмадик. Аммо кўп ўтмай бузилиб қолмоқда», – дейди 24-хонадонда яшовчи Мадина Ортиқова.
«Ҳозирги кунда бир дона замонавий лифтнинг нархи 160 миллион сўмгача. Гарчи бинонинг лифти ҳам маънан, ҳам моддий томондан эскириб кетган бўлса-да, шу вақтгача эътиборсиз қолиб келган. Энди бу соҳа энг долзарб масалалардан бирига айланди.», – дейди уй-жой, коммунал хўжалик бошқармаси.
«Ҳозирги кунда Яшнобод тумани Авиасозлар кўчаси 33-уйнинг олдида бунёдкорлик ишлари олиб борилмоқда. Албатта бундай ишларни ташкил қилиб Тошкент кўчаларини ободонлаштириш халқни оғирини енгил қилиш бу барчамизнинг бурчимиз ҳисобланади.
Шу қаторда бизнинг Яшнобод тумани Авиасозлар кўчаси 33-уйнинг лифтини ҳам шу бунёдкорлик йўли билан янгилаб берилса, хонадонда истиқомат қилувчилар миннатдор бўлар эди.
Бундан ташқари бинонинг ташқи ва ички ҳолати қурилгандан бери таъмирланмаган», — дейилади мурожаатда.
Изоҳ (0)