Yashnoboddagi 81 ta oila yashovchi uyda bir yildan beri lift ishlamayapti (foto)

“Daryo” tahririyatiga Toshkent shahar Yashnobod tumani Aviasozlar 4-mavze 33-uyda yashovchi fuqarolar nomidan ariza kelib tushdi. Fuqarolar arizada o‘zlari yashayotgan uyda qariyb bir yildan beri lift ishlamayotgani, shuningdek podyezddagi zinalar ham ta’mirtalab ekanligini bildirgan. Quyida murojaat o‘z holicha e’tiboringizga havola etiladi.

Toshkent shahar Yashnobod tumani Aviasozlar 4-mavze 33-uyda jami 81 ta xonadon mavjud. Ularning aksariyatida uzoq yillardan beri lift ishlamaydi. Liftlarning nosoz holga kelib qolganiga 20 yildan oshdi. Bu vaqt davomida deyarli har yili liftlar ta’mirlanadi va yana buzilaveradi. Bugungi kunga kelib esa ana shu lift yangilanishi shart bo‘lib qoldi.

2017-yil sentabr oyidan boshlab to joriy yilning bugungi kuniga qadar lift nosoz holda, ya’ni ishlamaydi. Xonadonning yosh-u qarisi, zinalardan foydalanib kelmoqda. Zinalarning ko‘rinishi bir ahvolga kelib qolgan.

Ba’zi bir xonadon egalari 1 yil davomida ko‘chaga chiqmasdan uy oynalaridan ko‘cha yuzini tomosha qilib o‘tiradi.

O‘tgan yilning 20-oktabr kuni shirkat boshlig‘i xonadon egalarini yig‘gan holda 2017-yilning dekabr oyiga liftni yangilab berish to‘g‘risida gapirib o‘tgan.

“Liftlarni ta’mirlashga ozmuncha pul ajratmadik. Ammo ko‘p o‘tmay buzilib qolmoqda”,  – deydi 24-xonadonda yashovchi Madina Ortiqova.

“Hozirgi kunda bir dona zamonaviy liftning narxi 160 million so‘mgacha. Garchi binoning lifti ham ma’nan, ham moddiy tomondan eskirib ketgan bo‘lsa-da, shu vaqtgacha e’tiborsiz qolib kelgan. Endi bu soha eng dolzarb masalalardan biriga aylandi.”, – deydi uy-joy, kommunal xo‘jalik boshqarmasi.

“Hozirgi kunda Yashnobod tumani Aviasozlar ko‘chasi 33-uyning oldida bunyodkorlik ishlari olib borilmoqda. Albatta bunday ishlarni tashkil qilib Toshkent ko‘chalarini obodonlashtirish xalqni og‘irini yengil qilish bu barchamizning burchimiz hisoblanadi.

Shu qatorda bizning Yashnobod tumani Aviasozlar ko‘chasi 33-uyning liftini ham shu bunyodkorlik yo‘li bilan yangilab berilsa, xonadonda istiqomat qiluvchilar minnatdor bo‘lar edi.

Bundan tashqari binoning tashqi va ichki holati qurilgandan beri ta’mirlanmagan”, — deyiladi murojaatda.