Одатда мамлакат миқёсида нишонланадиган катта байрамлар арафасида оммавий ахборот воситаларида кам таъминланган оила фарзандларининг суннат тўйларини ўтказиб берилганлиги ҳақидаги хабарлар тез-тез кўзга ташланиб туради. Бу ҳақда «Халқ сўзи» хабар бермоқда.
Журналистлар бу тадбирга, таъбир жоиз бўлса, «чопон кийдириб» юборишади. Аксарият мақолалар «Аҳолининг ижтимоий ҳимояга муҳтож қатламларини моддий ва маънавий қўллаб-қувватлаш, жамиятда ўзаро ҳамжиҳатлик, меҳр-оқибат, бағрикенглик ҳамда хайр-саховат муҳитини мустаҳкамлаш мақсадида», деб бошланади.
Туман ёки шаҳар ҳокимининг ташаббуси билан ўтказилган бундай тадбирни ёритиш жараёнида тўй болаларнинг фотосуратлари саҳифаларнинг кўринарли қисмига жойлаштирилади. Исми-фамилияси ёзилади, ота-онасидан интервьюлар олинади. Карнай-сурнай чалингани-ю, дастурхон ёзилгани, совға-саломлар тортиқ қилинганлиги, ёш қаҳрамон номига омонат дафтарчалари очилиб, вояга етганида олиши шарти билан катта миқдорда пул ҳам қўйилганлиги бот-бот таъкидланади.
Фикримизча, аввало, оқсоқоллар, кўпни кўрган ёши улуғлар суннат тўйи ҳақида бафуржа ўйлаб кўришлари лозим. Уни қилиш шартмикан? Бу каби тадбирларни майли, имконияти борлар ўтказаверсин.
Бир тасаввур қилинг: бундан йигирма йил аввал тўй боланинг омонат дафтарчасига қўйилган 10 минг сўм пулнинг бугунги қадри қанча бўлди? Ўша пайтда қўй олиш мумкин бўлган бу маблағга энди анқони уруғини ҳам олиб бўлмайди.
Энг асосийси, бу эмас. Гап орият ҳақида кетяпти. 25 ёшга кирган йигитга «Сенинг тўйингни ҳоким қилиб берганлар» қабилидаги дашном эшитишдан ҳам оғирроқ маломат бўлмаса керак. Бу фикрни яна ҳам ривожлантириш мумкин. Эҳтимол, кимлардир бошқача мушоҳада қилиши мумкиндир.
Аҳолининг ижтимоий ҳимояга муҳтож қисмини моддий ва маънавий қўллаб-қувватлаш, уларга меҳр ва саховат кўрсатиш — энг олий фазилат. Лекин унга ошкоралик бериш риёкорлик эмасмикан? Халқда «Ўнг қўлинг берганини, чап қўлинг билмасин» деган мақол бор. Алломалар савоб ишни ошкора қилгандан, пинҳона амалга ошириш афзаллигини кўп бора таъкидлаган.
Янгийўллик таниқли шоирнинг қабрга мармартош қўйганларнинг номи ҳозиргача номаълум. Ёки закот берувчилар унинг қиймати ва манзилини ошкора қилмайди. Бу жараён шундай одоб ва лутф билан амалга ошириладики, қабул қилувчи унинг эҳсон эканлигини ҳам билмай қолади. Бу каби мисолларни яна кўплаб келтириш мумкин.
Ўзбекистонда саховатли одамлар жуда кўп. Ёрдамга муҳтож оилаларга мурувват кўрсатиш учун унинг холидан хабар олиш лозим. Кўрсатилган мурувватни ошкор қилиш шарт эмас. Бундан ҳар икки томон ҳам бирдек манфаатдор бўлади.
Изоҳ (0)