Россиянинг АҚШдаги элчихонаси АҚШ Давлат департаментининг Қримни Россиянинг бир қисми сифатида тан олмаслик ҳақидаги декларациясига жавобини эълон қилди, деб ёзади «Ведомости».
«Энди Давлат департаментининг Косово — Сербия эмаслиги ҳақидаги декларациясини кутмоқдамиз», — деб ёзди россиялик дипломатлар.
Баёнот муаллифлари америкалик шерикларини «2014 йилда Қримни Россия таркибига қайтаришга асос бўлган, халқларнинг ўз тақдирини ўзи белгилаш ҳуқуқи тўғрисидаги низомларни ўз ичига олувчи халқаро ҳуқуқий ҳужжатлардан фойдаланишга уринаётгани» учун «бошқа воқелик»да яшашда айблади.
Косовонинг мустақиллигини 2008 йил бошида Сербияга кирувчи республиканинг парламенти эълон қилган. «Косово — бу Сербия» шиори Сербия ҳукумати томонидан ташкил қилинган норозилик намойишлари рамзига айланган эди.
Аввалроқ АҚШ Давлат департаменти раҳбари Майк Помпео Вашингтон Қримнинг Россияга ўтишини тан олмаслигини маълум қилиб, Москвани ярим оролнинг «истилоси»ни бас қилишга чақирди. Украина президенти Пётр Порошенко АҚШга ушбу қадам учун миннатдорлик билдирди.
Кейинроқ Буюк Британия ҳукумати АҚШни Қримнинг Россия таркибига киришига қаршилик кўрсатишда қўллаб-қувватлашини маълум қилди.
Изоҳ (0)