Тез орада Самарқанд шаҳрида замонавий, барча қулайликларга эга, хорижий меҳмонларга маъқул келадиган тўрт юлдузли меҳмонхоналар сони яна биттага кўпайиши мумкин. Бу ҳақда «Халқ сўзи» хабар бермоқда.
Самарқанд вилоят ҳокими вазифасини бажарувчи Эркинжон Турдимов Германиянинг Plaza Hotelgroup компанияси таъсисчилари билан учрашув ўтказди.
Учрашувда Best Western бренди остида бутун дунёга замонавий меҳмонхоналар қурилиши учун маҳсулотлар етказиб берувчи мазкур компаниянинг салоҳияти ҳақида малумотлар тақдим этилди. Шунингдек, тадбирда Самарқанд шаҳрида Best Western халқаро бренди остида 4 юлдузли меҳмонхона қуриш таклифи билдирилди.
Plaza Hotelgroup компаниясига 2002 йилда асос солинган. Ҳозирги кунда компания Германия, Австрия, Нидерландия ва Чехия давлатларида жаҳон стандартларига жавоб берувчи 34 та меҳмонхонасига эга.
Шунингдек, компания жаҳонда энг тез ривожланаётган замонавий меҳмонхона қурилиши ва реконструкция қилиниши, уни интергациялашган тизимда бошқариш имкониятига эга. Барча меҳмонхоналар халқаро тан олинган Best Western бренди остида бошқарилади.
Компания Ўзбекистонга меҳмонхоналар тармоғи бўйича 100 миллион доллар миқдорида тўғридан-тўғри инвестиция киритишни мўлжаллаган. Маълумотларга кўра, компания 3-5 йил давомида жами 8 та меҳмонхона қуриб, фойдаланишга топшириши мумкин.
Изоҳ (0)