Ургут тумани ички ишлар бўлими негизида Ички ишлар органлари фаолиятини мувофиқлаштириш бошқармаси ташкил этилган бўлиб, ўтган вақт мобайнида бу ўзгариш ўз самараси берди. Туман ички ишлар органлари халққа янада яқинлашиб, кўплаб жиноятлар сезиларли равишда камайди. Туман Ички ишлар органлари фаолиятини мувофиқлаштириш бошқармаси ходимлари янада самарали фаолият кўрсатиш мақсадида бошқарманинг ҳамма қулайликларга эга янги биноси қуриб фойдаланишга топширилди, деб хабар бермоқда «Дарё» мухбири Фарҳод Норбўтаев.
Янги бинонинг очилиш маросимида Ўзбекистон Республикаси Ички ишлар вазири, генерел майор П.Бобожонов, Самарқанд вилояти ИИБ бошлиғи, полковник А.Тошпўлатов, туман масъул раҳбарлари, кенг жамоатчилик вакиллари, фахрийлар, фуқаролар иштирок этди.
«Ургут тумани вилоятида ўз салоҳиятига эга, аҳолиси нисбатан кўп бўлган туманлардан биридир. Мазкур бошқармада қўриқлаш, миграция ва фуқароликни расмийлаштириш, йўл ҳаракати хавфсизлиги хизматлари учун алоҳида бинолар мавжуд. Шунингдек, казарма, вақтинча сақлаш ҳибсхонаси, кинология хизмати хизмат итларини сақлаш жойлари ҳам замонавий асосода бунёд этилган. Қишки ва ёзги спорт майдончалари, ошхона ходимлар ихтиёрида. 150 нафардан ортиқ шахсий таркибнинг самарали фаолият кўрсатиши учун бошқармада барча шароитлар муҳайё қилинган», – деди вазир маросимда сўзга чиқиб.
Таъкидлаш лозимки, Ургут тумани вилоятнинг саноатлашган ҳудудларидан биридир. Ўзбекистон Республикаси Президентининг 2017 йил 12 январдаги қарорига кўра мазкур ҳудудда «Ургут» эркин иқтисодий зонаси ташкил этилган бўлиб, 2017—2018 йилларда бу ерда 281, 1 миллион долларлик 80 та лойиҳани амалга ошириш кўзда тутилган. Агар бу лойиҳалар амалга ошиб, корхоналар тўла қувват билан ишлай бошласа 5 мингдан ортиқ иш ўрни яратилади.
Изоҳ (0)