Қизиқ факт: Самарқанд вилоятининг 2001 йил 11 сентябрдан кейинги етти ҳокими ҳозирда юқори лавозимларда ишламоқда

Самарқанд вилояти ҳокимлари билан боғлиқ яна бир қизиқ факт: қамоққа олинган Туробжон Жўраев ва вилоят ҳокими вазифасини бажаришга эндигина киришган Эркинжон Турдимовни ҳисобга олмаса, 2001 йил 11 сентябридан бошлаб вилоятга раҳбарлик қилган қолган етти ҳоким ҳозирда турли юқори лавозимларда меҳнат қилмоқда.

Ҳиммат Оқбўтаев — 2016 йил декабрида вилоят ҳокими этиб тайинланган ва беш ойдан сал кўпроқ давом этган ҳокимлигидан сўнг ишдан олинган. Президент Мирзиёев уни «жамоатчилик фикрини инобатга олмай иш тутгани, вилоятнинг бошқа раҳбарлари билан соғлом муносабатга путур етказгани, журъат ва ташаббускорлик етишмагани» ва яна бошқа камчиликлари учун ишдан олган. 2017 ноябридан бери эса Самарқанд вилоятининг Қўшработ туманида ҳокимлик қилиб келмоқда (айтмоқчи, Самарқанднинг янги ҳокими Эркинжон Турдимов айнан Қўшработдан).

Зойир Мирзаев — салкам олти йил Самарқандга ҳокимлик қилгач, 2016 йил декабрида Ўзбекистоннинг янги ҳукумати таркибидан ўрин олган. Шундан бери бош вазир ўринбосари сифатида қишлоқ ва сув хўжалиги, қишлоқ хўжалиги ва озиқ-овқат маҳсулотларини қайта ишлаш масалаларига масъул ҳисобланади.

Ўктам Барноев — Самарқандга 2008—2010 йилларда ҳокимлик қилган. Ишдан олинаётганида Президент Каримов уни «ишга масъулиятсизлик билан ёндашиш, ўзига ортиқча бино қўйиб, манманликка, ўзбошимчаликка берилиш»да айблаган. 2016 йил декабрида Барноев катта саҳнага қайтган — Президент Шавкат Мирзиёев уни Бухоро вилоятига ҳоким этиб тайинлаган (2018 йил февралида у ишдан олингани ҳақида хабарлар пайдо бўлганди, сўнг рад этилди).

Аъзамхон Баҳромов — вилоятга 1,5 йилга яқин вилоятга раҳбарлик қилган. Ишдан олинаётганида Президент Каримов уни «маънавий чегарадан чиқиб, ҳеч чидаб бўлмайдиган даражага етиб бориш, нафс балосига гирифтор бўлиш, бошқаларни менсимаслик, ўзини ҳаммадан устун қўйиш, қўполлик қилиш, оёғи ердан узилиш»да айблаган (2009 йили, жумладан, порахўрликда айбланиб, 15 йилга озодликдан маҳрум этилган эди). 2017 йили эса яна саҳнага қайтди — сентябрьда Самарқанднинг Қўшработ туманига, кейинроқ, ноябрида эса Каттақўрғон туманига ҳоким этиб тайинланди.

Мамаризо Нурмуротов — Самарқандга 2004—2006 йилларда ҳокимлик қилган; ЎзАнинг 2008 йилги ахборотига кўра, «саломатлиги ёмонлашиб, вилоятнинг биринчи раҳбари вазифасини бажаришга ҳар томонлама куч-қуввати етмагани инобатга олиниб», ҳокимликдан олинган. У 2017 йил июнидан бери Ўзбекистон Марказий банки раиси сифатида ишлаб келмоқда (хусусан, валюта либерализацияси ҳам унинг раислигида юз берди).

Рустам Холмуродов — олти ойдан сал кўпроқ Самарқанд вилоятига ҳокимлик қилган. Маълумотларга кўра, ҳокимликдан олингач, 12 йил давомида бирор лавозимда ишламаган. 2016 йил октябридан бери эса Самарқанд давлат университети ректори сифатида ишлаб келмоқда (ҳоким этиб тайинланишидан аввал ҳам шу лавозимда ишлаган).

Шавкат Мирзиёев — 2001 йил 11 сентябрь куни Самарқанд вилояти ҳокими этиб тайинланган. 2003 йил 12 декабрдан эса Ўзбекистон бош вазири лавозимида иш бошлаган. Ўзбекистон Биринчи Президенти вафотидан сўнг, 2016 йил 8 сентябрида Олий Мажлис томонидан Ўзбекистон Президенти вазифасини бажарувчи этиб тайинланди. 2016 йил 4 декабрь куни бўлиб ўтган Президент сайловида ғолиб чиқиб, 14 декабрдан Ўзбекистондан Президенти ваколатларини тўлақонли бажаришга киришди.