Ўзбекистон истеъмолчилар ҳуқуқларини ҳимоя қилиш жамиятлари федерацияси раиси Жаҳонгир Саримсоқов бошчилигидаги делегация Халқаро истеъмолчилар ташкилотининг (Consumers International, CI) Лондон шаҳридаги глобал офисига келди. Бу ҳақда ЎзА хабар бермоқда.
Ташкилот бош директори Аманда Лонг Ж.Саримсоқовга Ўзбекистон истеъмолчилар ҳуқуқларини ҳимоя қилиш жамиятлари федерацияси ушбу халқаро ташкилотга тўлақонли аъзо бўлганини тасдиқловчи сертификатни топширди. У федерацияни халқаро ташкилотнинг тўлақонли аъзоси бўлгани билан қутлар экан, CI билан федерациясининг икки томонлама ва минтақавий лойиҳалар доирасида ҳамкорлигига муваффақият тилади.
Шундан сўнг делегация аъзолари ташкилотнинг Истеъмолчилар ҳуқуқларини тарғиб қилиш масалалари бўйича директори Жастин Мак Миллан ҳамда Стратегик ривожланиш ва коммуникация масалалари бўйича директори Филлипа Хант билан музокара ўтказди.
Учрашув чоғида томонлар CI билан федерация ўртасида мустаҳкам ҳамкорлик алоқаларини йўлга қўйишга оид масалалар юзасидан фикр алмашди. Шунингдек, Ўзбекистон истеъмолчилар ҳуқуқларини ҳимоя қилиш жамиятлари федерацияси раиси Ж.Саримсоқовнинг номзоди Consumers International бошқарув кенгаши аъзолигига илгари сурилди.
Изоҳ (0)