Термизда «Ёш тадбиркорлар» коворкинг маркази, «Ёшлар меҳнат гузари» мажмуаси барпо этилади

Ўзбекистон Президентининг 2018 йил 27 июндаги «‘Ёшлар – келажагимиз’ Давлат дастури тўғрисида»ги фармони ижроси доирасида Термиз шаҳридаги маҳаллаларга бириктирилган 127 та ташкилот, корхона ва таълим муассасалари ходимларидан иборат ўнта ишчи гуруҳ уйма-уй юриб, ҳудудларда ёшларнинг ижтимоий аҳволи ва муаммоларини ўрганмоқда. Бу ҳақда ЎзА хабар берди.

Ишчи гуруҳ фаолиятини мувофиқлаштирадиган махсус штабда кунлик маълумотлар умумлаштирилиб, аниқланган камчилик ва муаммоларни бартараф этиш чоралари кўрилмоқда.

Шаҳарда қад ростлайдиган замонавий марказ ва мажмуада ёш тадбиркорлар учун хоналарни бепул ажратиш, йигит-қизларнинг стартаплари, бизнес ташаббуслари, ғоя ва лойиҳаларини рўёбга чиқариш учун тижорат банклари томонидан йиллик 7 фоиз ставка билан имтиёзли кредит ва мол-мулкни лизингга бериш, Давлат дастурига мувофиқ олинадиган кредит ҳажмининг 50 фоизидан кўп бўлмаган миқдорда кафилликлар бериш йўлга қўйилади. Ўрганиш натижалари бўйича ҳар бир ёшнинг муаммоси алоҳида рўйхатга олиниб, «Йўл харитаси» ишлаб чиқилади.

Ўзбекистон Ёшлар иттифоқи Термиз шаҳар кенгашидан олинган маълумотларга кўра, Сурхондарё вилояти марказида 80 мингдан зиёд ёшлар яшайди. Маҳаллаларда уйма-уй юриб ўрганишнинг дастлабки уч кунида ишчи гуруҳ аъзолари икки мингга яқин хонадонда бўлиб, 1000 дан ортиқ ёшлар билан суҳбатлашди.

Ўрганиш жараёнида уларнинг тадбиркорлик, бандлик, тижорат банкидан кредит олиш, уй-жой ва бошқа масалаларга оид кўплаб муаммолари аниқланди. 100 дан ортиқ иш билан банд бўлмаган йигит-қиз рўйхати шакллантирилди.

Тадбиркорлик фаолиятини бошламоқчи бўлган ёшларга амалий ёрдам кўрсатилди. Чунончи, ишчи гуруҳ аъзолари Шифокор маҳалласи хонадонларини ўрганаётганида Жанара Жумагамбетова тикувчилик билан шуғулланиши учун тижорат банкидан кредит олиш масаласида ёрдам сўради. Сирожиддин Жумаев енгил машиналарга техник хизмат кўрсатиш шохобчаси очиш учун тижорат банкининг молиявий кўмагига эҳтиёж сезаётганини айтиб, кредит маблағи олишга кўмаклашишни илтимос қилди.

Ўзбекистон маҳалласида яшаётган Рамиз Орамиддин паспорт олиш, Маъруфжон Қодиров эса абитуриентларни олий ўқув юртига тайёрлайдиган ўқув маркази ташкил этиш учун кредит маблағи ажратиш масаласини кўтарди. Мажнунтол маҳалласида истиқомат қилаётган Мухтор Мардонов тадбиркорлик билан шуғулланиши учун кўмаклашишни сўради.