Нукус халқаро аэропортида соатига 400 нафар йўловчига хизмат кўрсатиш имконига эга янги йўловчи терминали ишга туширилди. Бу ҳақда «Ўзбекистон ҳаво йўллари» МАК матбуот хизмати «Дарё»га хабар берди.
Терминал йўловчилар ва уларнинг юкларига халқаро стандартларга мувофиқ хизмат кўрсатиш имконини берадиган энг замонавий техника билан жиҳозланган. Бинода авиация хавфсизлигини таъминлаш учун муҳандислик ва технологик жиҳозлар ўрнатилган. Шунингдек, парвозолди назорати ва юк олиш майдонлари кенгайтирилган ҳамда рўйхатдан ўтиш устунлари сони кўпайтирилган. Терминалда маҳаллий ва халқаро авиайўналишлар учун йўловчилар зали, она-бола хоналари, тиббиёт пункти, валюта айирбошлаш шохобчалари, дўконлар, кафе-бар ва бошқа қулайликлар яратилган.
Янги терминалнинг дизайнини ишлаб чиқишда ҳудуднинг иқлим шароити ҳам ҳисобга олинган. Унда технология, хавфсизлик ва қулайлик ўртасидаги мувозанатга эришилган.
Нукус халқаро аэропорти ҳар қандай русумдаги самолёт ва вертолётларни қабул қилиш имконига эга. Учиш-қўниш йўлагининг узунлиги 3 минг метр, кенглиги 45 метрдан иборат. Аэродромда халқаро стандартларга жавоб берувчи замонавий ёритиш-сигнал ва аэронавигация ускуналари ўрнатилган.
Эслатиб ўтамиз, Нукус аэропортида янги йўловчи терминалининг ишга туширилиши ҳақида 26 июнь куни хабар қилинган. Май ойида аэропортнинг реконструкциядан кейин қандай кўринишга эга бўлишининг суратлари эълон қилинган.
Изоҳ (0)