Наманган вилояти «Қишлоқичимликсув» МЧЖ вакиллари қозоғистонлик ҳамкасблари тажрибалари билан танишиш мақсадида Чимкент вилоятига келди. Бу ҳақда «Дарё» мухбири хабар берди.
Туманлардаги «Сувоқава» корхоналари директорлари, бош муҳандислари, «Қишлоқичимликсув» МЧЖ мутасаддиларидан иборат делегация дастлаб Чимкент вилоятидаги сув таъминоти корхонаси музейида бўлди. Музей фаолияти билан танишиш асносида корхонанинг тарихи, бугунги кунда давлат-хусусий шериклик асосидаги бошқарув тажрибалари билан ўртоқлашилди.
Чимкент корхонаси бош муҳандиси Раҳимжон Шамсутдинов меҳмонларга аҳолига кўрсатилаётган хизматлар, ичимлик сувларини зарарсизлантириш, сув иншоотларидаги қудуқлар, муқобил электр энергияси ишлаб чиқариш борасидаги ишлар билан таништирди.
Жамият ишчи-ходимларига яратилган меҳнат шароитлари, касб малакасини ошириш бўйича чора-тадбирлар, кутубхона ҳамда сиҳатгоҳлар фаолияти меҳмонларда катта таассурот қолдирди.
– Келишимиздан кўзланган асосий мақсад ичимлик суви таъминотидаги янгиликлар, соҳада амалга оширилаётган ишлар, қўшни мамлакатда давлат-хусусий шериклик асосида олиб борилаётган чора-тадбирлар билан танишишдан иборат эди, — дейди Наманган вилояти «Қишлоқичимликсув» жамияти директори Салимжон Туламов. — Ўрганилган илғор тажрибаларни корхонамиз фаолиятида қўллаш сув таъминотида хизматни янада яхшилаш имконини беради.
Сафар якунида ўзаро ҳамкорликни янада мустаҳкамлаш, мунтазам равишда иш жараёнларини ўрганиб бориш, илғор тажрибаларни амалиётга татбиқ этиш бўйича келишувга эришилди.
Изоҳ (0)