Nukus xalqaro aeroportida soatiga 400 nafar yo‘lovchiga xizmat ko‘rsatish imkoniga ega yangi yo‘lovchi terminali ishga tushirildi. Bu haqda “O‘zbekiston havo yo‘llari” MAK matbuot xizmati “Daryo”ga xabar berdi.
Terminal yo‘lovchilar va ularning yuklariga xalqaro standartlarga muvofiq xizmat ko‘rsatish imkonini beradigan eng zamonaviy texnika bilan jihozlangan. Binoda aviatsiya xavfsizligini ta’minlash uchun muhandislik va texnologik jihozlar o‘rnatilgan. Shuningdek, parvozoldi nazorati va yuk olish maydonlari kengaytirilgan hamda ro‘yxatdan o‘tish ustunlari soni ko‘paytirilgan. Terminalda mahalliy va xalqaro aviayo‘nalishlar uchun yo‘lovchilar zali, ona-bola xonalari, tibbiyot punkti, valyuta ayirboshlash shoxobchalari, do‘konlar, kafe-bar va boshqa qulayliklar yaratilgan.
Yangi terminalning dizaynini ishlab chiqishda hududning iqlim sharoiti ham hisobga olingan. Unda texnologiya, xavfsizlik va qulaylik o‘rtasidagi muvozanatga erishilgan.
Nukus xalqaro aeroporti har qanday rusumdagi samolyot va vertolyotlarni qabul qilish imkoniga ega. Uchish-qo‘nish yo‘lagining uzunligi 3 ming metr, kengligi 45 metrdan iborat. Aerodromda xalqaro standartlarga javob beruvchi zamonaviy yoritish-signal va aeronavigatsiya uskunalari o‘rnatilgan.
Eslatib o‘tamiz, Nukus aeroportida yangi yo‘lovchi terminalining ishga tushirilishi haqida 26-iyun kuni xabar qilingan. May oyida aeroportning rekonstruksiyadan keyin qanday ko‘rinishga ega bo‘lishining suratlari e’lon qilingan.
Izoh (0)