Namangan viloyati “Qishloqichimliksuv” MChJ vakillari qozog‘istonlik hamkasblari tajribalari bilan tanishish maqsadida Chimkent viloyatiga keldi. Bu haqda “Daryo” muxbiri xabar berdi.
Tumanlardagi “Suvoqava” korxonalari direktorlari, bosh muhandislari, “Qishloqichimliksuv” MChJ mutasaddilaridan iborat delegatsiya dastlab Chimkent viloyatidagi suv ta’minoti korxonasi muzeyida bo‘ldi. Muzey faoliyati bilan tanishish asnosida korxonaning tarixi, bugungi kunda davlat-xususiy sheriklik asosidagi boshqaruv tajribalari bilan o‘rtoqlashildi.
Chimkent korxonasi bosh muhandisi Rahimjon Shamsutdinov mehmonlarga aholiga ko‘rsatilayotgan xizmatlar, ichimlik suvlarini zararsizlantirish, suv inshootlaridagi quduqlar, muqobil elektr energiyasi ishlab chiqarish borasidagi ishlar bilan tanishtirdi.
Jamiyat ishchi-xodimlariga yaratilgan mehnat sharoitlari, kasb malakasini oshirish bo‘yicha chora-tadbirlar, kutubxona hamda sihatgohlar faoliyati mehmonlarda katta taassurot qoldirdi.
– Kelishimizdan ko‘zlangan asosiy maqsad ichimlik suvi ta’minotidagi yangiliklar, sohada amalga oshirilayotgan ishlar, qo‘shni mamlakatda davlat-xususiy sheriklik asosida olib borilayotgan chora-tadbirlar bilan tanishishdan iborat edi, — deydi Namangan viloyati “Qishloqichimliksuv” jamiyati direktori Salimjon Tulamov. — O‘rganilgan ilg‘or tajribalarni korxonamiz faoliyatida qo‘llash suv ta’minotida xizmatni yanada yaxshilash imkonini beradi.
Safar yakunida o‘zaro hamkorlikni yanada mustahkamlash, muntazam ravishda ish jarayonlarini o‘rganib borish, ilg‘or tajribalarni amaliyotga tatbiq etish bo‘yicha kelishuvga erishildi.
Izoh (0)