4 июль, чоршанба куни АҚШ президенти Дональд Трамп космик қўшинлар мамлакат ҳарбий кучларининг тўлақонли қисми сифатида тез орада шакллантирилишини маълум қилган, дея «ТАСС» хабар бермоқда.
«Биз яқинда космик қўшинларга эга бўламиз. Бу ишга ҳамма катта қизиқиш билан қарамоқда», — дея Трамп Оқ уй балконидан туриб АҚШ мустақиллигининг 242 йиллиги муносабати билан президент қароргоҳининг Жанубий майсазорига йиғилган ҳарбийлар ва уларнинг оила аъзолари олдида маълум қилган.
Трамп 18 июнь куни космик кучларни шакллантириш тўғрисида буйруқ берган. «Америка учун космосда шунчаки мавжуд бўлишнинг ўзи кам, биз у ерда ҳам етакчи бўлишимиз зарур. Бу жуда муҳим. Шунинг учун, мен шу дамнинг ўзида мудофаа вазирлигига ҳозироқ космик кучларни шакллантиришга киришишни буюраман», — дея Трамп Оқ уйда Миллий космик кенгаш аъзолари билан бўлиб ўтган мажлисда маълум қилган.
Трамп космик кучларни шакллантириш тўғрисидаги фикрини бир неча маротаба айтган. Хусусан, март ойида Калифорния штатида Мирамар авиабазасида денгиз пиёда аскарлари олдида нутқ сўзлаганида Трамп АҚШнинг янги миллий космик стратегиясида космосга ҳам худди ер, ҳаво ва денгиз сингари ҳарбий ҳаракатлар майдони сифатида қаралишини айтиб ўтган. «Биз космосда қиладиган ишларимиз ҳали жуда кўп, шунинг учун ҳам бизга космик кучлар керак», — дея Трамп сўзини якунлаган.
Аввалроқ, Конгрессда Пентагон бюджети муҳокама қилинганида ҳарбий кучларнинг космос учун мўлжалланган турини яратиш масаласи кун тартибига қўйилган, бироқ таклиф рад этилган. Мудофаа вазири Жеймс Меттис ва ҳарбий-ҳаво кучлари бошқармаси таклифга қарши чиққан.
Ҳарбий-ҳаво кучлари вазири Хезер Уилсон ва ҳарбий-ҳаво кучлари штаби бошлиғи генерал Дэвид Горлдфин Конгресснинг бир қатор йиғилишларида ҳарбий-ҳаво кучлари космик қўшинларни шакллантирмай ҳам космосдаги етакчилик борасида қўйилаётган вазифаларнинг уддасидан чиқиши мумкинлигини маълум қилган. Пентагон август ойига қадар Конгрессга президент буйруғини бажариш қанчалик мураккаб бўлиши мумкинлиги ҳақидаги хулосаларини тақдим қилиши керак.
Изоҳ (0)