АҚШ президенти Дональд Трамп ва Россия президенти Владимир Путиннинг учрашуви 16 июль куни Хельсинкида бўлиб ўтади, дея хабар бермоқда Meduza Кремль матбуот хизматига таяниб.
Музокаралар чоғида «Россия-Америка алоқаларининг ҳозирги ҳолати ва уларни янада ривожлантириш истиқболлари, шунингдек, халқаро кун тартибидаги долзарб масалалар муҳокама қилинади», — дейилади Кремль хабарида.
Трамп ва Путиннинг учрашиши ҳақида 27 июнь куни АҚШ президентининг миллий хавфсизлик бўйича маслаҳатчиси Жон Болтоннинг Москвага ташрифи чоғида келишиб олинган эди.
Аввалроқ АҚШ вице-президенти Майк Пенс Америка етакчиси Дональд Трамп Россия президенти Владимир Путин билан учрашувда қандай мавзуларни кўтаришини маълум қилган эди.
Буюк Британия ҳукумати эса АҚШ раҳбари нима ҳақда гапиришини ҳеч ким олдиндан била олмаслиги сабабли, Трамп ва Путиннинг учрашуви юзасидан хавотир билдирди.
Изоҳ (0)