Баъзида битта фильм бутун ҳаётга бўлган қарашимизни ўзгартириб юбориши мумкин. Айниқса, у реал воқеаларга асосланган бўлса. Қуйида рейтинги 8 дан юқори бўлган ва чуқур ўйлашга даъват этадиган кучли таъсирга эга фильмлар ҳақида маълумот берамиз.
“Шиндлер рўйхати”
Агар тарихда Холокост мавзусини шу қадар синчковлик билан тасвирлаб берган режиссёр бўлса, бу Стивен Спилберг бўларди. “Шиндлер рўйхати” — унинг фаолиятидаги асосий асари ҳисобланади. Иккинчи жаҳон уруши пайтида деярли 1 200 яҳудийни қутқариб қолган немис тадбиркори ҳақидаги фильм ўша йили барчани ҳайратда қолдирган.
Кадрларнинг аксарияти оқ-қора рангда суратга олинган — бу эса томошабинга ўтмишга назар солиш ҳиссини беради. Фильм атмосфераси юракни эзади, умидсизлик кайфиятини тақдим этади, бироқ шу билан бирга, энг қора кунларда ҳам эзгулик ва жасорат бўлиши мумкинлигини эслатади.
Сюжетга кўра, немис тадбиркори Оскар Шиндлер Холокост пайтида минглаб полшалик яҳудийларни ўлимдан қутқаради. Фильмни яратишга Шиндлер томонидан қутқарилган яҳудийлардан бири Полдек Пфефферберг туртки бўлган. Бутун дунёга унинг қутқарувчиси ҳақида гапириш истаги Полдек учун қатъий ғояга айланган.
1982 йилда Пфефферберг билан ишлаган ёзувчи ва сценарий муаллифи Томас Кенали “Шиндлер кемаси” романини чоп этган. Китобни кўриб чиққан режиссёр Стивен Спилберг сюжетга қизиқиб қолиб, шундан сўнг Universal Studios романга фильм ишлаш ҳуқуқини қўлга киритган. Аммо картинани суратга олиш фақат 10 йилдан кейин бошланган. Фильм шиори Талмуддан келган иқтибос бўлган: “Кимки битта ҳаётни сақлаб қолса, бутун дунёни қутқарган бўлади”.
Мазкур драма дунё бўйлаб кўплаб мукофотларга лойиқ деб топилган. “Кинопоиск”да фильм рейтинги — 8.8, IMDbъда эса деярли рекорд — 9 баллни тўплаган.
“Тафаккур ўйинлари”
Фильм буюк математик олим Жон Неш ҳаётига бағишланган. Сюжетга кўра, у болалигиданоқ рақамлар ва ҳисоб-китоблар дунёсига шўнғиб кетади. Йиллар ўтиб, ёш математик Принстондаги ўқишини тугатади ва у ерда тадқиқот олиб боради. Ўқитувчилик қилиб юрганида тақдир унга бўлажак рафиқасини рўбарў қилади. Бир куни Жон Марказий разведка бошқармасида ишлашни таклиф қилган агент Парчер билан танишади. У газеталарда яширинган Қўшма Штатлар душманларининг шифрланган хабарларини излаши керак бўлади. Неш янги иш билан шуғулланар экан, кимдир уни доимий равишда кузатаётганидан шубҳалана бошлайди ва кейинчалик ҳаммани шубҳа остига олади.
Фильм сценарийси ва йўналиши шундай тузилганки, томошабин дунёга бош қаҳрамоннинг кўзи билан қарайди ва дастлаб ҳақиқат сифатида кўрсатилган нарсага ишониш мумкинми, деб ҳайрон бўлади. Мазкур лойиҳа 2002 йилда 4 та “Оскар”ни, жумладан, “Энг яхши фильм” номинациясини қўлга киритган.
“Кинопоиск” сайтида ушбу фильмга 8.5 балл берилган. IMDb фойдаланувчилари эса уни 8.2 балл билан баҳолаган.
“Қўлингдан келса тутиб ол”
Режиссёр Стивен Спилбергнинг Фрэнк Эбигнейл исмли фирибгар ҳаёти асосида суратга олинган детектив драмаси ҳам кўплаб эътирофга сазовор бўлган.
Сюжетга кўра, Фрэнк Эбегнейл одамлар билан тез тил топишадиган, қизлар кўнглига осон йўл топа оладиган ёш йигит бўлади. Бундан ташқари, у ўзи ўйлаб топган ёлғонларига атрофдагиларни ишонтиришга ҳам уста бўлади. Бугун у адвокат бўлишни ихтиёр этса, эртага учувчилар кийимини кияди, кейинги кун эса у беморларни текширади, ҳаттоки уларга ташхис ҳам қўяди.
Хушмуомала ва маданиятли Фрэнкнинг аслида фирибгар экани ҳеч кимнинг хаёлига келмайди. Агар у ФҚБ агенти Карл Хенреттининг назарига тушмаганида Фрэнкнинг кирдикорлари узоқ давом этар эди.
Бош ролларни Леонардо Ди Каприо ҳамда Том Хенкс ижро этган мазкур фильм рейтинги “Кинопоиск”да — 8.5, IMDb’да — 8.1 баллни ташкил этади.
Изоҳ (0)