Фарғона вилоятининг Олтиариқ туманидаги «Исмоил Нозимобод» фермер хўжалиги дала шийпонида «Қишлоқ хўжалигида инновацион технологияларни қўллаш имкониятлари ва ходимларнинг интеллектуал салоҳиятини ошириш» мавзусида семинар-тренинг ўтказилди. Бу ҳақда «Дарё»га вазирлик матбуот хизмати маълум қилди.
Қишлоқ хўжалиги вазири Баҳодир Юсупов модераторлигида ўтган тренинг ортиқча расмиятчиликсиз, очиқ мулоқот ва баҳс-мунозара асносида ташкил этилди. Унда иштирок вилоят, туман қишлоқ хўжаликлари бўлимларининг раҳбар ва масъул ходимлари, ҳокимларнинг соҳавий ўринбосарлари кун давомида бирга ишлади. Cоҳани янги босқичга олиб чиқиш борасида таклифлар муҳокама қилиниб, муаммолар ўртага ташланди.
Туманлардан келган 260 нафар қатнашчига тарқатма материаллар билан биргаликда Марсель Брион қаламига мансуб китоб тақдим этилди, дала шийпонида китоб ярмаркаси ташкил этилди. Тошкент ахборот технологиялари университети профессори Дурбек Халиловнинг «Электрон ҳукумат ва унинг афзалликлари» мавзусидаги тақдимоти иштирокчиларда катта қизиқиш уйғотди.
— Малакали кадрларга бўлган талабни қондириш учун айни пайтда вазирликнинг вилоят бошқармалари тавсияси асосида ёшларни Россиянинг етакчи олий ўқув юртларига суҳбат асосида ўқишга жўнатиш тизими йўлга қўйилди. Энди хорижий сафарларга фақат вазирлик марказий аппарати ходимлари эмас, чекка туманлардан ҳам вакилларимиз иштирокини таъминлаймиз. Шунингдек, фермерларни тажриба алмашиш учун илғор тажрибага эга хорижий мамлакатларга сафарлари мунтазам ташкил этилади, — деди Баҳодир Юсупов.
Вазирнинг таъкидлашича, ўтган йилги статистик маълумотларга кўра, Ўзбекистонда 3,9 миллион тонна картошка етиштирилган. Бу эса аҳоли эҳтиёжлари етиб ортади. Бироқ, ҳукумат миқёсидаги ҳаракатлар эвазига Эрон ва Россиядан картошка импорт қилинди. Бу узоқ йиллар давомида озиқ-овқат етиштириш борасидаги ҳисоб-китобларда қўшиб ёзиш, тахминий маълумотларга таянилганининг оқибати. Энди эса бунга йўл қўйиб бўлмайди. Аҳоли эҳтиёжларини аниқ ҳисоблаб, маҳсулот етиштиришни ташкил этиш, қишлоқ хўжалигида қайта ишлаш жараёнларини тезлаштириб, унинг экспорт салоҳиятини ошириш, кластер услубини кенгроқ жорий этиш лозим.
Голландия тажрибасидан мисол келтирадиган бўлса, ушбу мамлакатда аҳолининг меҳнатга яроқли қисмини 4 фоизи қишлоқ хўжалиги соҳасида банд бўлган ҳолда етиштирилган маҳсулотларнинг 80 фоизи экспортга йўналтирилади. Бу эса қишлоқ хўжалигига илмий ва инновацион ёндашувнинг натижасидир. Ўзбекистон замини нафақат 35 миллион аҳоли, балки ундан анча ортиқ одамни ҳам боқа олади. Бунинг учун ишни тўғри ташкил этилса бас.
Семинарда мамлакат озиқ-овқат хавфсизлигини таъминлашда вазирлик ҳудудий бошқарма ва бўлимлари масъулиятини ошириш омиллари, бу борадаги вазифаларни режалаштириш, маҳсулот етиштирувчиларни интеллектуал салоҳиятини ошириш, муаммоли вазиятларнинг ечимини интерфаол усуллар ёрдамида топиш, қишлоқ хўжалигида инновацияларни жорий этиш, соҳага хорижий инвестицияларни кенг жалб этиш масалалари атрофилича муҳокама қилинди.
Изоҳ (0)