Farg‘ona viloyatining Oltiariq tumanidagi “Ismoil Nozimobod” fermer xo‘jaligi dala shiyponida “Qishloq xo‘jaligida innovatsion texnologiyalarni qo‘llash imkoniyatlari va xodimlarning intellektual salohiyatini oshirish” mavzusida seminar-trening o‘tkazildi. Bu haqda “Daryo”ga vazirlik matbuot xizmati ma’lum qildi.
Qishloq xo‘jaligi vaziri Bahodir Yusupov moderatorligida o‘tgan trening ortiqcha rasmiyatchiliksiz, ochiq muloqot va bahs-munozara asnosida tashkil etildi. Unda ishtirok viloyat, tuman qishloq xo‘jaliklari bo‘limlarining rahbar va mas’ul xodimlari, hokimlarning sohaviy o‘rinbosarlari kun davomida birga ishladi. Cohani yangi bosqichga olib chiqish borasida takliflar muhokama qilinib, muammolar o‘rtaga tashlandi.
Tumanlardan kelgan 260 nafar qatnashchiga tarqatma materiallar bilan birgalikda Marsel Brion qalamiga mansub kitob taqdim etildi, dala shiyponida kitob yarmarkasi tashkil etildi. Toshkent axborot texnologiyalari universiteti professori Durbek Xalilovning “Elektron hukumat va uning afzalliklari” mavzusidagi taqdimoti ishtirokchilarda katta qiziqish uyg‘otdi.
— Malakali kadrlarga bo‘lgan talabni qondirish uchun ayni paytda vazirlikning viloyat boshqarmalari tavsiyasi asosida yoshlarni Rossiyaning yetakchi oliy o‘quv yurtlariga suhbat asosida o‘qishga jo‘natish tizimi yo‘lga qo‘yildi. Endi xorijiy safarlarga faqat vazirlik markaziy apparati xodimlari emas, chekka tumanlardan ham vakillarimiz ishtirokini ta’minlaymiz. Shuningdek, fermerlarni tajriba almashish uchun ilg‘or tajribaga ega xorijiy mamlakatlarga safarlari muntazam tashkil etiladi, — dedi Bahodir Yusupov.
Vazirning ta’kidlashicha, o‘tgan yilgi statistik ma’lumotlarga ko‘ra, O‘zbekistonda 3,9 million tonna kartoshka yetishtirilgan. Bu esa aholi ehtiyojlari yetib ortadi. Biroq, hukumat miqyosidagi harakatlar evaziga Eron va Rossiyadan kartoshka import qilindi. Bu uzoq yillar davomida oziq-ovqat yetishtirish borasidagi hisob-kitoblarda qo‘shib yozish, taxminiy ma’lumotlarga tayanilganining oqibati. Endi esa bunga yo‘l qo‘yib bo‘lmaydi. Aholi ehtiyojlarini aniq hisoblab, mahsulot yetishtirishni tashkil etish, qishloq xo‘jaligida qayta ishlash jarayonlarini tezlashtirib, uning eksport salohiyatini oshirish, klaster uslubini kengroq joriy etish lozim.
Gollandiya tajribasidan misol keltiradigan bo‘lsa, ushbu mamlakatda aholining mehnatga yaroqli qismini 4 foizi qishloq xo‘jaligi sohasida band bo‘lgan holda yetishtirilgan mahsulotlarning 80 foizi eksportga yo‘naltiriladi. Bu esa qishloq xo‘jaligiga ilmiy va innovatsion yondashuvning natijasidir. O‘zbekiston zamini nafaqat 35 million aholi, balki undan ancha ortiq odamni ham boqa oladi. Buning uchun ishni to‘g‘ri tashkil etilsa bas.
Seminarda mamlakat oziq-ovqat xavfsizligini ta’minlashda vazirlik hududiy boshqarma va bo‘limlari mas’uliyatini oshirish omillari, bu boradagi vazifalarni rejalashtirish, mahsulot yetishtiruvchilarni intellektual salohiyatini oshirish, muammoli vaziyatlarning yechimini interfaol usullar yordamida topish, qishloq xo‘jaligida innovatsiyalarni joriy etish, sohaga xorijiy investitsiyalarni keng jalb etish masalalari atrofilicha muhokama qilindi.
Izoh (0)