Самарқанддаги Имом Бухорий мажмуаси 60 гектар майдонда қайта қурилади (фото)

Президентнинг «Ўзбекистон Республикаси Вазирлар Маҳкамаси ҳузурида Имом Бухорий халқаро илмий-тадқиқот марказини ташкил этиш чора-тадбирлари тўғрисида»ги қарорига мувофиқ Самарқанд вилоятининг Пайариқ туманидаги буюк муҳаддис номи билан аталувчи ёдгорлик мажмуаси ёнида марказ бунёд этилмоқда. Бу ҳақда ЎзА хабар берди.

Умумий лойиҳа қиймати 122 миллиард сўм бўлган ушбу халқаро илмий-тадқиқот марказининг қурилиш-пудрат ишлари якунланиш арафасида. 6 гектар майдонни эгаллаган марказ ҳудудида ҳадисшунослик мактаби ва мазкур мактаб тингловчилари учун ётоқхона, ошхона, спорт-соғломлаштириш масканлари қурилди. Шу билан бирга, илмий марказ қаршисида ҳар бири 18 хонадонли 3 та уч қаватли турар жой ҳамда мажмуага олиб борувчи Оқдарё – Қўлбости автомобиль йўли бўйида миллий кўринишдаги 2 қаватли 62 та коттеж қуриб битказилди.

Бу марказ келгусида Имом Бухорий мажмуаси билан яхлит комплекс сифатида Ўзбекистонда етишиб чиққан буюк алломалар меросини ўрганиш ва тадқиқ этишга хизмат қиладиган маърифат масканига айланади. Бу эса, ўз навбатида, мазкур ҳудудни янада обод этиш, зиёрат туризми имкониятлари кенгайиб бораётганини ҳисобга олган ҳолда, мажмуани халқаро талаблар даражасида реконструкция қилиш ҳамда зиёратчилар учун қулай шароитлар яратишни тақозо этади.

Ишлаб чиқилган бош режа ва лойиҳа таклифига мувофиқ, мажмуанинг умумий майдони 60,4 гектарни ташкил этиб, тўлиқ қайта реконструкция қилинади. Жумладан, кириш қисмидаги бир қаватли бинолар икки қаватли қилиб қурилади.

Шунингдек, 1 та тўрт қаватли катта, 6 та уч қаватли ўртача ва 20 та икки қаватли кичик меҳмонхоналар, супермаркет, йирик савдо маркази, амфитеатр биноси, деҳқон бозори, ҳаммом, 2 та таҳоратхона, миллий ҳунармандчилик буюмлари ва сувенир сотиладиган 16 та савдо дўкони, чойхона, ресторан, болалар ўйин майдончаси, 3 та автомобиллар турар жойи, минибанк ва бошқа бинолар бунёд этилади.

Имом Бухорий мажмуасидан ўтувчи Оқдарё – Қўлбости автомобиль йўли олти тасмалига кенгайтирилиб, Хартанг қишлоғини 5 километр масофада тўлиқ айланиб ўтади.

Мажмуа қайта қурилиши муносабати билан ҳудуддаги 164 та турар жой ва 30 та нотурар жой бинолари бошқа жойга кўчирилди.