Россия президенти Владимир Путиннинг собиқ рафиқасига тегишли компаниялардан бири солиқ ва йиғимлардан, хусусан, пенялар билан биргаликда 320 204 рубль қарз бўлиб қолди. Йил бошидан буён суд ижрочилари Людмила Путинанинг солиқ қарзларини йиғиш учун активларини топишга ҳаракат қилмоқдалар, аммо барчаси беҳуда кетмоқда, деб хабар беради Tengri News.
2014 йилда турмуш ўртоғи билан ажрашган Людмила Путина ўзининг қизлик фамилияси — Шкребнева номига «Интерьерсервис» савдо компаниясини очган эди. Унга «Меридиан» риэлторлик фирмаси ҳам тегишли. 2016 йил охирида ушбу фирма балансида деярли ярим миллиард рубль мавжуд бўлган.
Шу билан бирга Людмила Путинанинг фирмаларидан бири расман банкрот бўлган. 2017 йил охирида Москва солиқ инспекцияси «Интерьерсевис»нинг давлат олдида қарзи борлиги тўғрисида акт тузган.
16 январь куни суд ижрочилари ушбу факт асосида алоҳида иш бошлаган, бироқ бир ой ўтгач иш ёпилган. Бунга «қарздорнинг жойлашган жойи, унинг мулки ёки унга тегишли нақд пул ва қимматбаҳо буюмлар мавжудлигини аниқлаш имкони бўлмаган»лиги далил қилиб келтирилган.
5 март куни суд ижрочилари яна янги иш очган. Бироқ «Интерьерсервис»нинг нафақат кўчмас мулки ёки ЙҲХБда рўйхатдан ўтган машинаси, балки банк ҳисоби ҳам бўлмаган.
Изоҳ (0)