Яман жанубидаги Абьян провинциясида «ал-Қоида» жангарилари ҳужуми оқибатида уч нафар ҳарбий ҳалок бўлди, яна етти нафари жароҳат олди. Бу ҳақда «РИА Новости» хабар берди.
Жангарилар миналаштирилган машина ёрдамида БАА томонидан қўллаб-қувватланадиган хавфсизлик белбоғи кучлари казармасига ҳужум қилган.
Хабар қилинишича, мазкур ҳужумдан кейин террорчилар яна бир ҳужумни уюштирган.
Оқибатда хавфсизлик белбоғи кучлари раҳбарининг ўринбосари ва икки нафар аскар ҳалок бўлган, шунингдек, етти нафар аскар, хусусан, кучлар қўмондони жароҳат олган.
«Ал-Қоида» террорчилари Ямандаги таранг вазиятдан фойдаланиб, асосан мамлакатнинг жанубий қисмида ҳаракат қилади. Мамлакатда 2014 йилдан буён ҳукумат ва «Ансоруллоҳ» ҳаракатининг исёнчилари ўртасида ҳарбий-сиёсий низо давом этмоқда.
Изоҳ (0)