Навоий вилояти Кармана тумани Талқоқ маҳалласида ёшлар учун барпо этилган уйларнинг калити ўз эгаларига топширилди. 64 та хонадонга мўлжалланган тўрт қаватли бинога ёш оилалар кўчиб кирди. Бу ҳақда ЎзА хабар берди.
Ўзбекистон Республикаси Вазирлар Маҳкамасининг 2014 йил 8 сентябрдаги «Мамлакатнинг ижтимоий ҳаётида фаол қатнашаётган ёш оилаларни уй-жой билан таъминлашни янада қўллаб-қувватлаш чора-тадбирлари тўғрисида»ги қарори ижроси доирасида Навоий вилоятида ҳам тизимли ишлар амалга оширилмоқда.
Давлат ва жамоат ҳаётида фаол иштирок этаётган, фан, таълим, маданият, спорт, ишлаб чиқариш ва бошқа соҳаларда юксак натижаларга эришаётган, республика ҳамда халқаро олимпиадалар, мусобақалар, фестивалларда фаол қатнашаётган ёшларни рағбатлантириш, ёш оилаларни қўллаб-қувватлаш мақсадида берилаётган «Ёшлар уйлари» замонавий лойиҳалар асосида қурилган. Хонадон соҳибларига уйнинг тўлови учун бошланғич бадалсиз, 20 йил муддатга имтиёзли ипотека кредити ажратилади.
Замонавий турар жой бунёд этилишига «Зарафшон овози» ва «СМУ-10» масъулияти чекланган жамиятлари қурувчилари муносиб ҳисса қўшди. Кўп қаватли уйлар атрофида «Китоб олами» савдо мажмуаси, «Ёшлик» болалар ва ўсмирлар спорт мактаби фаолияти йўлга қўйилди. Шунингдек, болалар ўйингоҳлари, спорт майдончалари, турли савдо иншоотлари ҳам барпо этилди.
Изоҳ (0)