«Ўзбекистон анори» бренди яратилади
Шавкат Мирзиёев Қува туманидаги «Фарғона анорчилик» агрофирмаси фаолияти билан танишганидан сўнг анорчилик бўйича илмий марказ, Фарғона давлат университетида кафедра ташкил этиш, Инновацион ривожланиш вазирлиги билан ҳамкорликда ген технологиясини ривожлантириш, «Ўзбекистон анори» брендини яратиш, данаксиз анор навларини ўзлаштириш бўйича топшириқлар берди. Бу ҳақда «Дарё»га вазирлик матбуот хизмати маълум қилди.
Инновация вазирлиги мазкур топшириқларни амалга оширишга киришди. Аввало, 500 гектар майдонда анор ниҳолларини етиштиришга мўлжалланган кўчатхона ташкил қилиш юзасидан ташкилий ишлар бошлаб юборилди. Фанлар академиясининг Геномика ва биоинформатика маркази масъулларига республика ҳудудидаги 40 га яқин анор навларининг молекуляр-генетик паспортини яратиш бўйича вазифа юклатилди.
Олий ва ўрта махсус таълим, Қишлоқ хўжалиги ва Инновацион ривожланиш вазирликлари ҳамда Фарғона вилояти ҳокимлиги 2018–2019-ўқув йилидан бошлаб анорчилик хўжаликларига олий малакали кадрлар тайёрлаш учун Фарғона давлат университетида «Агрономия» (анорчилик) таълим йўналиши бўйича кадрлар тайёрлашни йўлга қўйиш, кафедра ва магистратура мутахассисликларини очишга келишиб олди.
Мазкур таълим йўналиши очилишини инобатга олиб, қанд миқдори юқори бўлган ҳосилдор навли кўчатларни етиштириш, анор касалликлари хамда зараркунандалари бўйича илмий-тадқиқот ишларини олиб бориш бўйича қарор лойиҳаси ишлаб чиқилмоқда.
Қарор лойиҳасида 2018—2019-ўқув йилида янги йўналиш бўйича қабул квотасининг белгиланиши, мутахассисларни жалб этиш, чет эл тажрибаларини ўрганиш учун уларни малака оширишга юбориш, кўчат етиштириш ишларини ташкиллаштириш, иссиқхона, ўқув-тажриба майдони ва лабораториялар ташкил қилиш учун зарур бўлган ер майдонларини ажратиш ва уларни бюджет маблағлари ҳисобидан молиялаштириш масалалари инобатга олиниши кутилмоқда.
