Ўзбекистон ИИВ сайтидаги «Қидирувдаги шахслар» бўлимида ўзбекистонлик спорт арбоби ва бизнесмен Ғофур Раҳимов қидирилаётгани ҳақида ахборот-карточка пайдо бўлди. Карточкада Ғофур Раҳимовнинг сурати, туғилган санаси ва қайси моддалар бўйича айбланаётгани кўрсатиб ўтилган.
Карточкага кўра, Ғофур Раҳимов Жиноят кодексининг 165-моддаси 3-қисми «а» банди («Жуда кўп миқдордаги товламачилик»), 243-модда («Жиноий фаолиятдан олинган даромадларни легаллаштириш») ва 228-модда 3-қисми («Ҳужжат қалбаки эканлигини била туриб, ундан фойдаланиш»)да назарда тутилган жиноятларни содир этганликда гумон қилинмоқда.
Маълумот учун, қайд этилган биринчи модда бўйича айбдор деб топилган шахс 10 йилдан 15 йилгача, иккинчи модда бўйича 5 йилдан 10 йилгача озодликдан маҳрум этилиши мумкин. Учинчи модда бўйича жазо вариантлари кўп — энг кам иш ҳақининг 25 бараваридан 50 бараваригача миқдорда жарима ёки 300 соатгача мажбурий жамоат ишлари ёки 2 йилгача ахлоқ тузатиш ишлари ёки 2 йилгача озодликни чеклаш ёки 2 йилгача озодликдан маҳрум қилиш.
ИИВ сайтидаги «Қидирувдаги шахслар» бўлимига биргина Ғофур Раҳимовнинг эмас, балки унинг рафиқаси — Лола Раҳимованинг ҳам карточкаси ҳам жойлаштирилган. Турмуш ўртоғи қайси моддалар бўйича қидирувга берилган бўлса, аёл ҳам ўша моддалар асосида қидирилмоқда.
Ғофур Раҳимов Ўзбекистонда биринчи марта 2013 йили қидирувга берилган, қидирув халқаро миқёсда бўлгани учун Раҳимов қидирилаётгани ҳақидаги маълумот «Интерпол» сайтида ҳам бўлган. Бироқ 2016 йили рўйхатдан ўчирилган. Ғофур Раҳимов ва унинг рафиқаси қидирилаётгани тарихда илк бор Ўзбекистон ИИВ сайтида эълон қилинмоқда.
Ғофур Раҳимов охирги 20 йиллардан бери Ҳаваскор боксчилар халқаро ассоциациясида (AIBA) раҳбарлик лавозимларида ишлаб келади, 2018 йил январида эса ташкилотнинг муваққат президенти этиб сайланган. У 2017 йил охирида АҚШнинг «қора рўйхати»га киритилган эди, айни вақтда шу рўйхатдан чиқиш ҳаракатида эди. Шу муносабат билан «Мен ҳеч қачон ҳеч қандай уюшган жиноий гуруҳ билан боғлиқ бўлмаганман, менга қарши ҳеч қачон айбловлар илгари сурилмаган», деганди.
Изоҳ (0)