Тошкентда «Давгеодезкадастр» қўмитаси (Ўзбекистон), Гео-Альянс компанияси (Россия) ҳамда Digital Globe компанияси иштирокида халқаро семинар ўтказилди. Бу ҳақда қўмита матбуот хизмати хабар берди.
13—14 июнь кунлари Россиянинг Гео-альянс компанияси, АҚШнинг Digital Globe компанияси ҳамда Ер ресурслари, геодезия, картография ва давлат кадастри давлат қўмитаси ҳамкорлигида «Ерни масофадан зондлаш маълумотларини қўллаш ва уларни қайта ишлашнинг замонавий технологиялари» мавзусида халқаро семинар бўлиб ўтди.
Семинарда вазирлик ва идора мутахассислари ҳамда «Давгеодезкадастр» қўмитаси мутахассислари қатнашди. Семинардан кўзланган мақсад Ўзбекистонда Ерни масофадан зондлаш маълумотларини қўллаш ва уларни қайта ишлашнинг замонавий технологияларини жорий этишни янги босқичга олиб чиқишдир. Семинарни «Давгеодезкадастр» қўмитаси раис ўринбосари Рўзметов Мақсуд очиб берди ва бу соҳадаги илғор технологияларни ривожлантириш қўмита мутахассисларининг асосий вазифаларидан бири эканлигини айтиб ўтди.
Семинарда хорижий мутахассислар Максим Александров (Гео-Альянс), Полина Медведева (Гео-Альянс), Илья Юдин (Digital Globe) ўзларининг тақдимотлари билан иштирок этишди ва семинар давомида Ерни масофадан зондлаш маълумотларини қўллаш мавзусида мастер-класслар ўтказишди.
Изоҳ (0)