КХДР бу ҳафта бўлиб ўтиши режалаштирилган икки томонлама ҳарбий музокараларда иштирок этадиган делегация вакилларининг рўйхатини Жанубий Кореяга юборди. Бу ҳақда Жанубий Кореянинг миллий мудофаа вазирлигининг 12 июнь, сешанба куни берган маълумотига таяниб, «ТАСС» хабар берди.
Генерал-лейтенант Ан Ик Сан бошчилигидаги 5 кишидан иборат делегация 14 июнь, пайшанба куни генераллар музокараларида иштирок этади. Yonhap News агентлигининг маълумотларига қараганда, Ан Ик Сан бу каби музокараларда 2004 йилдан буён иштирок этади.
Шимол ва жанубнинг ҳарбий вакиллари учрашуви Сеулдан 60 километр узоқликдаги Пханмунжом чегара пунктининг шимолий тарафидаги «Тхонъильгак» павильонида бўлиб ўтади. Жанубий Корея делегациясига генерал-майор Ким До Гюн раҳбарлик қилади. У миллий мудофаа вазирлигида икки Корея ўртасидаги музокаралар билан шуғулланади. Унга мудофаа идоралари ҳамда Кореяни бирлаштириш вазирлигининг 4 нафар вакили ҳамроҳлик қилади.
Музокаралар давомида томонлар ўзаро доимий мулоқотни йўлга қўйиш, шунингдек, икки мамлакат ҳарбий қўмондонликлари ўртасида алоқа линияларини ўрнатиш сингари масалалар муҳокама қилинади. Шунингдек, 1950-1953 йилларда Корея уруши давомида ҳарбий ҳаракатлар тақиқланган ҳудудда ҳалок бўлган аскарлар жасадини қидириш ва қайта дафн қилиш масаласи ҳам кўрилиши мумкин.
Изоҳ (0)