Лондоннинг “Арсенал” клуби Португалиянинг “Спортинг” жамоаси ҳужумчиси Виктор Дёкерешни сафга қўшиб олишга жуда яқин. Бу ҳақда машҳур журналист Фабрицио Романо ўзининг ижтимоий тармоқдаги саҳифасида хабар берди.
Манбага кўра, 27 ёшли швед футболчисининг агентлари аллақачон Лондонга етиб келган ва трансфер бўйича якуний музокараларни олиб бормоқда. Шартномага оид масалалар келишиб олингач, Дёкереш тиббий кўрикдан ўтиш учун Англияга йўл олади.
“Арсенал” ушбу трансфер учун 70 миллион евро тўлашга, шунингдек, қўшимча тарзда 10 миллион евро бонус ажратишга тайёр. “Спортинг” футболчини сақлаб қолишни истаётган бўлса-да, Дёкереш жамоани тарк этишни истамоқда. У клуб раҳбарияти билан келишмовчиликка борган ва мавсумолди йиғинларда иштирок этмаяпти.
Эслатиб ўтамиз, Виктор Дёкереш 2023 йилдан бери “Спортинг” шарафини ҳимоя қилиб келмоқда. Бу давр ичида у 102 ўйинда майдонга тушиб, 97 та гол ва 28 та голли узатмага муаллифлик қилган. Шунингдек, у Швеция терма жамоаси таркибида 26 учрашувда иштирок этиб, 15 та гол киритган.
Transfermarkt портали маълумотларига кўра, Дёкерешнинг ҳозирги бозор қиймати 75 миллион еврога тенг.
Изоҳ (0)