KXDR bu hafta bo‘lib o‘tishi rejalashtirilgan ikki tomonlama harbiy muzokaralarda ishtirok etadigan delegatsiya vakillarining ro‘yxatini Janubiy Koreyaga yubordi. Bu haqda Janubiy Koreyaning milliy mudofaa vazirligining 12-iyun, seshanba kuni bergan ma’lumotiga tayanib, “TASS” xabar berdi.
General-leytenant An Ik San boshchiligidagi 5 kishidan iborat delegatsiya 14-iyun, payshanba kuni generallar muzokaralarida ishtirok etadi. Yonhap News agentligining ma’lumotlariga qaraganda, An Ik San bu kabi muzokaralarda 2004-yildan buyon ishtirok etadi.
Shimol va janubning harbiy vakillari uchrashuvi Seuldan 60 kilometr uzoqlikdagi Pxanmunjom chegara punktining shimoliy tarafidagi “Txonilgak” pavilyonida bo‘lib o‘tadi. Janubiy Koreya delegatsiyasiga general-mayor Kim Do Gyun rahbarlik qiladi. U milliy mudofaa vazirligida ikki Koreya o‘rtasidagi muzokaralar bilan shug‘ullanadi. Unga mudofaa idoralari hamda Koreyani birlashtirish vazirligining 4 nafar vakili hamrohlik qiladi.
Muzokaralar davomida tomonlar o‘zaro doimiy muloqotni yo‘lga qo‘yish, shuningdek, ikki mamlakat harbiy qo‘mondonliklari o‘rtasida aloqa liniyalarini o‘rnatish singari masalalar muhokama qilinadi. Shuningdek, 1950-1953-yillarda Koreya urushi davomida harbiy harakatlar taqiqlangan hududda halok bo‘lgan askarlar jasadini qidirish va qayta dafn qilish masalasi ham ko‘rilishi mumkin.
Izoh (0)