Ўзбекистоннинг Россиядаги бош консули Меҳриддин Хайриддинов Ставропол ўлкасига келди. Бу ерда у Россия президенти маъмурияти, ўлка ҳукумати, муниципалитет ва жамоатчилик вакиллари билан учрашди, дея маълум қилди Ставропол телевидениеси.
Меҳриддин Хайриддинов Ўзбекистонда туризм ва аҳолини соғломлаштириш, жумладан, сиҳатгоҳларни ривожлантириш масалаларига катта эътибор берилаётганини қайд этди. Улардан айримлари Россия ҳудудида жойлашган. Хусусан, Кисловодскдаги «Ўзбекистон» санаторийси. Унинг йиллик қуввати ҳозирда 75-80 фоизга фойдаланилмоқда.
— «Ўзбекистон» санаторийси нафақат республика фуқароларини соғломлаштиришга қаратилган ижтимоий, балки иқтисодий ва молиявий фойда келтирадиган инвестициявий лойиҳага ҳам айланиш истиқболларига эга, — таъкидлади Кисловодск мери Александр Курбатов.
Бош консул ўлка мутасаддилари билан иқтисодиёт, соғлиқни сақлаш, маданият ва туризм соҳаларидаги алоқаларни ривожлантириш, минтақада Ўзбекистон кунларини ўтказишга қаратилган протокол таклифларини имзолади.
Изоҳ (0)