Санкт-Петербургдаги Шарқ қўлёзмалари институтида «Шарқ китобат санъатининг нодир дурдоналари» номли кўргазма ташкил этилди, деб ёзмоқда ЎзА.
Кўргазма «Ўзбекистон маданий мероси – халқлар ва мамлакатлар ўртасидаги мулоқотга йўл» Иккинчи халқаро конгресси доирасида ташкил қилинган.
Шарқ қўлёзмалари институтида Ўзбекистондан келтирилган ёки ўзбек халқига тааллуқли ўнлаб қўлёзмалар сақланади. Улардан бири милодий VIII асрда араб алифбосининг кўфий-ҳижозий хатида кўчирилган Қуръони Карим нусхасидир. Қўлёзманинг бир нечта саҳифаси Қашқадарё вилояти, Тошкент ва Бухоро шаҳарларида сақланмоқда. Қолган саҳифалар қаерда экани номаълумлигича қолмоқда.
Маълумотларга кўра, китоб бир пайтлар Қашқадарё вилоятининг Қамаши туманидаги Катта Лангар қишлоғида, тасаввуфдаги Ишқия тариқати шайхлари хонақоҳида сақланган. Шу боис қўлёзма илмий жамоатчилик орасида «Катта Лангар Қуръони» номини олган. Китобнинг катта қисми – 81 саҳифаси қандай қилиб Россияга бориб қолгани ҳақида турли тахминлар мавжуд. У Шарқ қўлёзмалари институтига ўтган асрнинг 30 йиллари охирида келтирилган.
Илмий изланишлар натижасида Ўзбекистон ва Россияда сақланаётган саҳифалар айнан битта қўлёзманинг таркибий қисмлари экани, улар чиндан ҳам бундан 13 аср муқаддам кўчирилгани аниқланган. Мутахассисларнинг фикрича, у Қуръони Каримнинг ислом оламидаги энг қадимий нусхаларидан бири ҳисобланади.
2017 йилда «Ўзбекистон маданий мероси дунё тўпламларида» лойиҳаси доирасида Европа технологиялари асосида «Катта Лангар Қуръони»нинг факсимиле нусхалари яратилган. Нусхалардан бир нечтаси кўргазма доирасида Санкт-Петербург шаҳрига келтирилди. Улардан бири қўлёзманинг асл нусхаси сақланаётган Шарқ қўлёзмалари институтига совға қилинди.
Шунингдек, кўргазмада «Катта Лангар Қуръони»нинг асл нусхаси саҳифалари, Абу Райҳон Берунийнинг «Қадимги халқлардан қолган ёдгорликлар», Алишер Навоийнинг «Куллиёт», «Лисон ут-тайр», «Вақфия» сингари асарлари, Самарқанд, Бухоро, Хива, Қўқон каби шаҳарларда яратилган китобат санъатининг намуналари намойиш этилди.
Изоҳ (0)