2018 йил 4 июнь куни «Ўзбекистон почтаси» АЖ акциядорлари Евгений Биргерни бош директор этиб тайинлаш борасида қарор қабул қилди. Бу ҳақда жамият матбуот хизмати хабар берди.
24 май куни Ахборот технологиялари коммуникацияларини ривожлантириш вазири Азим Аҳмадхўжаев Евгений Биргерни «Ўзбекистон почтаси» АЖ жамоасига таништирган эди.
Евгений Биргер 1960 йилнинг 19 майида Москва вилоятида туғилган. У 1982 йилда Москва электротехник алоқа институтини тамомлаган. Иқтисод фанлари номзоди. Биргер турли йилларда Россия алоқа вазирлиги почта алоқаси департаменти раҳбари ва «Россия почталари»ни стратегик ривожлантириш кенгаши аъзоси бўлиб ишлаган.
Евгений Биргер 22 май куни Тошкентдаги #MITCROADMAP2018 конференциясида нутқ сўзлаб, «Ўзбекистон почтаси» амалдаги нормативлар ва анъанавий фаолиятини амалга ошира олмаётгани ва у тубдан ўзгартиришларга муҳтож эканлигини таъкидлади.
У фуқаролар ҳаёти ва ташкилотлар фаолиятига почтанинг чуқур кириб боришини кўзда тутувчи «Почта 2.0» лойиҳасини тақдим этди.
2016 йилнинг 19 январидан «Ўзбекистон почтаси» директори лавозимида Шуҳрат Отамуҳаммедов ишлаб келаётган эди. 12 май куни у Учтепа тумани ҳокими этиб тайинланди.
Изоҳ (0)